Ájtte duottar- ja sámemusea lea dieđihan Sámediggái ja Stáda historjjálaš museii ahte sii eai hálit šat vurkkodit sámi bázahusaid museas.
Sámi bázahusat leat dolin roggojuvvon Rounala hávdeeatnamis davábealde Gárasavvona. Sámediggi lea guhká bargan vai oaiveskálžžuid šáhtášii fas hávdádit ja lea gáibidan Ruoŧa ráddehusas ahte nu geavvá.
Ájtte duottar- ja sámemusea hoavda Elisabet Pirak Kuoljok čilge Sámerádio ja SVT Sápmái ahte sii eai hálit šat vurkkodit sámi bázahusaid ja ahte gáibádusa ulbmil lea ahte fas guorahallagohtet ášši.
Sámedikki kulturlávdegotti ságadoalli Ingrid Inga čilge ja son lea ilus go Ájtte duottar- ja sámemusea Johkamohkis dieđiha ahte sii eai šat hálit hálddašit Rounala olmmošlaš oaiveskálžžuid ja dávttiid.
– Jus livččii Sámedikki duohken, de livčče áigá juo hávdáduvvon, dadjá Ingrid Inga Sámeradio ja SVT Sápmái.
