Ikte dohkkehuvvui ođđa liturgiija. Dásseárvo- ja vealahanáittardeaddji Hanne Bjurstrøm sávvá oaidnit rievdademiid eará oskobirrasiin maid.
– Dat guhkes ja lossa gižžu, man homofiillat leat jahkeviissaid bargan, lea leamaš ávkkálaš. Jáhkán dat rahpá uvssaid maid eará oskkuide dohkkehit homofiillaid, lohká dásseárvo- ja vealahanáittardeaddji Hanne Bjurstrøm preassadieđáhusas.
Cuoŋománus dohkkehii Girkočoahkkin ahte homofiila ja heterofiila náittosdilit galget dásseárvosaččat. Dál lea liturgiija maid dohkkehuvvon.
– Girku dohkkeha dál formálalaččat ahte ráhkisvuohta seamma sohkabealálaččaid gaskka lea liikká divrras. Mii illudit oaidnit maid rievdadus buktá, lohká Bjurstrøm.
Lossat leamaš
Náittosláhka bođii 2009:s, dat dagai homofiillaid ja heterofiillaid dásseárvosažžan. Muhto homofiillat eai leat beassan girkus náitalit ovdal go Girkočoahkkin dál dohkkehii ođđa liturgiija.
– Olu homofiillain lea, ja lea leamaš, lossa dilli iežaset oskku dáfus. Sávan dát liturgiija addá doaivaga sidjiide geat ain fertejit rahčat beassat leahkit gii son lea, lohká áittardeaddji.
Son maid deattuha girku geatnegasvuođa ovddasguvlui.
– Girku lea geatnegahttojuvvon heivehit maiddái seamma sohkabealálaččaide, vaikko gos riikkas leat.
Bjurstrøm sávvá oaidnit rievdadusaid eará oskobirrasiin maid.
