Lesbbat, homofiillat, bifiillat ja tránsa olbmot vásihit olu dávjjibut go muđui earát álbmogis vaššicealkámušaid ja konkrehta áitagiid.
Eanet go okta juohke viđa LHBT-olbmos (Lesbbat, homofiillat, bifiillat ja tránsa olbmot) lea vásihan vaššicealkámušaid.
Birrasiid 15 proseanta sis fas leat vásihan oažžut konkrehta áitagiid.
Dan čájeha varas iskkadeapmi man Institutt for Samfunnsforskning (ISF) lea čađahan.
Iskkadeamis leat kárten lesbaid, homofiillaid, bifiillaid ja tránsaolbmuid (LHBT-olbmuid) vásáhusaid.
Iskkadeamis leat geahččan man dávjá LHBT-olbmot vásihit vaššicealkámušaid ja man dávjá sii áitojuvvojit, ja buohtastahttán sin vásáhusaid muđui álbmoga vásáhusaiguin.
Gullet vášši-, bilkideaddji- ja hejošeaddjicealkámusaid
– Dát lea okta dain viidámus kártemiin dán fáttás mii lea čađahuvvon Norggas. Bohtosat čájehit ahte LHBT-olbmot hui čielgasit vásihit eanet vaššicealkámušaid, bilkideaddjicealkámušaid, hejošeaddjicealkámušaid dahje konkrehta áitagiid go muđui álbmot, čilgeba ISF-dutkit Audun Fladmoe ja Marjan Nadim preassadieđáhusas.
Soai leaba ožžon bargun Mánáid-, nuoraid- ja bearašdirektoráhtas čállit dán raportta.
Vásihan áitagiid
Dutkit leaba čađahan jearahallaniskkadeami masa serve 409 LHBT-olbmo ja 1315 olbmo geat ovddastit muđui álbmoga.
Soai leaba jearran leat go sii maŋemus 12 mánu vásihan iežaset vuostá heajoscealkámušaid dahje oaidnán duođalaš cealkámušaid.
Dutkit leaba maid jearran mo dát cealkámušat váikkuhedje dahje čuhce sidjiide.
15 proseanta LHBT-olbmuin muitaledje ahte sii maŋemus jagi leat vásihan konkrehta áitagiid.
Dušše 4 proseanta sis geat ovddastedje muđui álbmoga leat vásihan dan seamma.
23 proseanta LHBT-olbmuin vástidedje ahte sii leat gullan vaššicealkámušaid iežaset vuostá.
36 proseanta muitalit ahte sii leat ožžon hejošeaddjikommentáraid maŋemus jagi.
Sin gaskkas geat ovddastedje muđui álbmoga vástidedje 10 proseanta ahte leat vásihan vaššicealkámušaid ja 18 proseanta fas ahte leat gullan hejošeaddjicealkámušaid iežaset birra.
Čielgasit stuorát oassi vásihit unohisvuođaid
– Iskkadeamis kárte olbmuid iežaset vásáhusaid ja maid sii ieža vásihit áittan dahje vaššicealkámuššan, ja mii adnojuvvo áittan dahje vaššicealkámuššan rievddada olbmos olbmui. Dattetge čájeha iskkadeapmi čielgasit ahte olu stuorát oassi LHBT-olbmuin muitalit unohis dahje vašuheaddji cealkámušaid birra mat leat sin čalmmiid ovddas daddjon sidjiide dahje čállon interneahtas, muitaleaba Fladmoe ja Nadim preassadieđáhusas.
Dagaha dorvvuhisvuođa
Raporttas boahtá ovdán ahte interneahtta lea dat báiki gos LHBT-olbmot dávjjimusat vásihit vaššicealkámušaid.
Oallugat vásihit maiddái dán iežaset bargosajiin.
Sin gaskkas geat leat vásihan vaššicealkámušaid, vástidit stuora oassi LHBT-olbmuid ahte dat lea dahkan sin dorvvoheapmin.
– Dat nanne dan maid eará iskkadeamit juo leat čájehan, namalassii ahte vaššicealkámušain sáhttet leat stuorát váikkuhusat olbmuide geat gullet unnitlogujoavkkuide, ja sii dan geažil eai searvva almmolaš digaštallamiidda, go ballet bilkiduvvot ja cielahuvvot, lohkaba Audun Fladmoe ja Marjan Nadim.
