– Áitagat čájehit ahte lea eanet dárbu dáidagii

Ruoŧa sápmelaš grafittidáiddár Anders Sunna lea ovttas  Linda «Zina» Aslakseniin Álttá nuoraidskuvlla seaidnái ráhkadan diŋgojuvvon dáidaga, mii lea boktán garra digaštallama ja buktán moaitámušaid mat leat viidát leavvan. Sunna muitala ahte son lea áitagiid ožžon ja fasttes čállosiid su birra dáidaga oktavuođas, muhto dat eai bastte sutnje.

– Mun lean bajásšattadettiin ja maiddái ovdal iežan dáidaga geažil ožžon iešguđetlágan áitagiid. Dan dihte lean ge hárjánan diekkáriidda, lohká Sunna.

Dušše movttiidahttá

Sunna ii váldde áitagiid duođalaččat, iige son bija áiggi dain ballat ja beroštit.

– Mun jurddašan nu ahte áitagat vigget jávohuhttit sámiid jiena ja kultuvrra, muhto munnje doaibmá dat jorggu ládje. Dat baicca čájehit ahte lea vel eanet dárbu dákkár dáidagii, ja dat gal movttiidahttá mu vel eanet bargagoahtit dáidagiin, lohká son.

Ii heahpanaddat sámevuođain

Anders Sunna oaivvilda skuvlla dehálaš báikin gos nuorat golahit eanaš áiggi, ja lea doppe gos mii hábmet iežamet boahttevaš álbmoga.

– Danne lea dehálaš ahte sii ožžot dan ipmárdusa ahte sámevuohta lea juoga mainna galgá čevllohallat iige heahpanaddat. Jus eat beasa dan ovddidit, de eat beasa friddja goassige, lohká Sunna.

Sápmelaččat maid moaitán

Danne leage su mielas imaš go maiddái sápmelaččat gávdnojit sin searvvis geat moitet dáidaga ja háliidit vealahit sámevuođa.

– Imaštalan go sámit láitet, go de han leat seammás náđđume ja diktime iežaset vealahuvvot. Dan ii galgga goassige dahkat go dat ii sápmelaččaid sivva, dat lea sin geat vigget vealahit ja duolbmut sámevuođa.

Ain dárbu rájiid sirdit

Sunna muitala ge sus leat juo ollu idéat ja jurdagat makkár dáidaga áigu ovddasguvlui ráhkadit.

– Mu mielas lea ain dárbu sirdit rájiid, ja sámevuođa loktet vel eanet albmosii.