Fylkkamánni dieđiha dán vahkkoloahpa ahte heajos guohtundilli joatká ain.
Sihke Romssas ja Finnmárkkus joatká váttis guohtundilli dan olu muohttaga dihte. Fylkkamánni ávžžuha olbmuid váldit gulul go leat meahcis vuodjime.
Suohkanat fertejit gulahallat boazodoaluin skuterláhtuid rahpamiid oktavuođas.
Eará aktevrrat, nu go ovdamearkka dihte valáštallansearvvit, fertejit čielggadit vuodjimiid boazodoaluin.
Orohagat sáhttet ohcat doaibmadoarjagiid ja sáhttet ávžžuhit giddet skuterluottaid. Fylkkamánni sáhttá giddet skuterláhtuid ja giddet vuodjimiid guovlluin jođánit vai suddje daid guovlluid gos bohccot leat, dieđiha Fylkkamánni sin neahttasiiddus.
Heahteguovllut:
Ii leat mihkkege rievdan guohtundili ektui daidda geaidda roassu čuohcá, dieđiha Fylkkamánni.
Guovvamánu 19. beaivvi lei heahtegearggusvuođalávdegoddečoahkkin ja meroštalle máŋga orohaga gullat heahteguovlluide.
Čuovvovaš guovllut Romssas ja Finnmárkkus leat heahtegearggusvuođalávdegottis meroštallan heahteguovlun:
Guovdageaidnu: Orohat 30C nuortajohtolat ja orohat 30 B gaskajohtolat.
Kárášjohka: Orohat 16 Kárášjoga oarjjábealli ja orohat 17 Kárášjoga nuorttabealli.
Mátta-Várjjat: Orohat 5C Báhčaveadji.
Beardu ja Málatvuopmi: Basečohka ja Álddesjávrri orohat.
Heahtegearggusvuođalávdegoddi ovttasbargá Fylkkamánniin viiddidit diđošteami vahkku 9 ja 10:s. Dan maŋŋel árvvoštallo galgá go lávdegoddi viiddidit heahteguovllu eanet, dieđiha Fylkkamánni.
