Politiijat dieđihit ahte leat ain olles veagain ohcamin Odd Henry Lahma Deanus.
Politiijat dieđihit ahte sii álggahedje ohcamiid fas dán iđida diibmu 05:00 ja sii doaimmahit ohcamiid seamma veagain.
200:s ohcamin
Dál leat birrasii 200 olbmo ohcamin Odd Henry Lahm, gii ii leat dihtton lávvardat rájes.
Sotnabeaivve dieđihedje ruovttubuohccidivššárbálvalusas ahte son ii lean ruovttus Sieiddás.
Sotnabeaivve eahkeda ja ija mielde ohcagohte ge veahkkebálvalusat albmá.
Ohcet sihke eatnan alde ja helikopteriin
Eaktodáhtolaččat, Ruovttusuodjalus, Siviilasuodjalus, Norgga gádjunbeatnagat, politiijat, buollinčáskadeaddjit ja Rukses Ruossa leat ohcamin dál 80-jahkásaš Odd Henry Lahm Deanus.
Maiddái Suodjalusa helikopter ja Orion girdi leamaš mielde ohcamin su ja Sea King helikopter maiddái oassálastá ohcamis Odd Henry.
Sátnejođiheaddji sávvá albmá gávdnot
Deanu sátnejođiheaddji Frank Ingilæ lohká ahte lea buorre go bures doibmet buot bálvalusat ohcamiin ja olu olmmošlaš resurssat geavahuvvojit dál Deanus.
– Lea váivi ja surgat go ii leat vel gávdnon, dadjá Frank Ingilæ.
Cavgil politiijaide jus leat oaidnán dahje dieđát maidige mii livččii ávkin gávdnat Deanu albmá Odd Henry Lahm.
