Kárášjoga gánda Vegard Bjørsmo lea ain mielde «Stjernekamp» gilvvus maŋŋel go ovdanbuvttii Hip-Hop ja joavkobarggu lávvordaga.
Bjørsmo ovdanbuvttii álggos GDFR – Flo Rida feat. Sage the Gemini & Lookas akto, ja de maŋŋel lei vel mielde joavkobarggus ovdanbuktit Rednex joavkku lávlaga Cotton eye Joe fárrolaga Emil Solli-Tangeniin ja Odd Einar Nordheimain.
Lávvordaga lei Nordheim gii oaččui unnimus jienaid ja šattai guođđit gilvvu.
Bjørsmo lei sin searvvis geat ožžo doarvái jienaid vai eai lean eahpesihkkarat beassat joatkit.
Boahtte lávvordaga beassá Bjørsmo lávlut fárrolaga KORK:in, dasa lassin go galgá čájehit musikála.
