-Almmuhus-
OĐĐASATAin eahpesihkarvuohta Bissojogas

Ain eahpesihkarvuohta Bissojogas

-

-

Boares skuvlavistti Bissojogas lea šaddan dorvoguovddážin, ja dál lea Poršaŋggu gielda ohcame buoret lanjaid Bissojoga ohppiide.

Geasseluomus heaittihedje sihke Bissojoga skuvlla ja nuoraidskuvlla Billávuonas, muhto maŋŋel suohkanválggaid mannan čavčča, de mearridii ođđa gielddastivra rahpat fas giliskuvllaid nu jođánit go vejolaš.

 

Ohcet lanjaid

Billávuonas lea plána rahpat skuvlla fas guovvamánu 1.beaivvi rájes, muhto Bissojogas orro dát ádjáneame guhkit áiggi.

– Bissojogas boahtá ádjánit go fertet gávdnat buori skuvlalanjaid, čállá Porsáŋggu sátnejođiheaddji Aina Borch gieldda neahttasiiddus.

 

Dorvoohccit orrot skuvlavisttis

Dat boares lanjat Bissojoga skuvllas geavahuvvojit dorvoohcciide orrunbáikin, nu ahte gielda lea ohcame eará lanjaid mat dohkkejit skuvladoaimmaide. Bissojogas bovdejit dál váhnemiid diehtojuohkinčoahkkimii dán áššis.

– Ođđa bajásšaddanhoavda álgá doaibmat barggus guovvamánu 15.beaivvi rájes, ja áigu ovttas doaibmi bajásšaddanhoavddain deaivvadit váhnemiiguin Bissojogas ođđajagimánu 19.beaivvi.

 

Ii leat mearriduvvon dáhton goas Bissojoga skuvlla fas rahpet, ja dan botta vuojáhallet ain Bissojoga skuvlamánáid Leavnnja skuvlii. Dán čállá Ruijan Kaiku.

-Almmuhus-