-Almmuhus-
-Almmuhus-
-Almmuhus-
OĐĐASATAin árvvoštallamin maid dahket

Ain árvvoštallamin maid dahket

-

-

Beannot jagi maŋŋil go eananeaiggát skeŋkii Mari Boine mánnávuođaruovttu Sámiid Vuorká-Dávviriidda, leat sii ain árvvoštallamin maid dahket áššis. Dál hoahpuha opmodateaiggát sin.

Golggotmánus 2013 čálii Ávvir ahte Mari Boine mánnávuođaruoktu Gámehisnjárggas Kárášjogas, galggai boldot buollinčáskadanhárjehallamis. Dát boaldin bissehuvvui, ja son guhte dál oamasta dán eananbihttá ja dálu, Stig Harby, fálai dalle skeŋket dálu Sámiid Vuorká-Dávviriidda (SVD).

 – Dan rájes in leat gullan maidege konkrehta SVDas, ja lean ođđajagis gulaskuddan singuin ja dáhtton gullat maid jurddašit dahkat dáinna. Lean ain vuordimin vástádusa, go mus ii leat nu miella gal čatnat opmodaga ja persovnnalaččat šaddat vurkkodit dálu mii galgá geavahuvvot museadoaimmas mas loahpa loahpas liikká ii soaitte šaddat mihkkege, dadjá Harby guhte ássá Šveicas.

 

Mielas vuovdit eatnama

Harby muitala ahte 2013:s go fálai dálu SVD:i de jerre maid oastit opmodaga gos dállu lea.

 – Mun dadjen dalle ahte lean rabas digaštallat dán, ja lean ain mielas digaštallat vaikke maid muhto eanaš háliidan dušše ahte ášši čielggaduvvo, dadjá Harby.

Sus ledje plánat hukset astoáiggedálu dán opmodahkii gos Boine mánnávuođaruoktu ceaggá.

 – Jus ii leat kulturhistorjjálaš beroštupmi dan dállui de mun čuovun iežan plána ja ceggen ođđa dálu dohko. Mus ii leat gelbbolašvuohta iige dilli álggahit priváhta Mari Boine musea, čilge son.

 

SVD gulaskuddamin earáiguin

SVD eaiggátstivrra ođđa jođiheaddji Hjalmar Strømeng muitala iežaset bargamin áššiin.

 – Mii leat gieskat sádden reivve dán birra RiddoDuottarMusea vuođđudussii ja jearran maid sii oaivvildit leat buoremussan dán áššis, go sis lea dat fágalaš gealbu dákkár barggus, čilge Strømeng ja muitala iežaset maid váldimin oktavuođa Kárášjoga gielddain.

 – Mii háliidat gullat maid gielda oaivvilda áššis, čilge son.

 


SVD-eaiggátstivrrajođiheaddji Hjalmar Strømeng
Vuorkágovva: Inga Marie Guttorm

Čoahkkin ihttin

RiddoDuottaMusea doaibmi direktevra Berit Åse Johnsen duođašta iežaset ožžon reivve SVD:s.

 – Dál in sáhte vuos kommenteret áššái, mis lea ihttin stivrračoahkkin gos maiddái gieđahallat dán ášši ja dan maŋŋil sáhtán kommenteret, vástida Johnsen.

 

– Ii gánnát sirddašit

Hjalmar Strømengas SVD:s dattege gal vuhtto oaivil dán áššis:

 – Mii fertet rehkenastit olu máksá dán dálu váldit badjelasamet, jus dien galgat váldit de fertešeimmet dan eatnama maid váldit iežamet nammii. Doppe Gámehisnjárggas han lea Mari Boine bajásšaddan iige musea luhtte, dadjá Strømeng ja lasiha:

 – Dat lea mieskan dállu iige oro gánnáheamen dan gaikkodit ja sirdit ja de divuhit, muhto dat ii heađisge mearkkaš ahte eat beroš das. Dás lea dušše sáhka mo teknihkalaččat galgat dahkat dáinna dáluin.

 

Opmodateaiggát goittot ge sávvá ášši jođánit čovdot.

 – Mun vuhtten ahte dalle go ášši beakkehii de lei stuorra beroštupmi ja olusat geat áŋgirušše, ii dušše SVD. Go de buohkat ožžo vejolašvuođa konkrehtalaččat bargagoahtit áššiin, ja go dárbbašuvvo dagut eaige dušše oaivilat de ášši dego nogai. Vaikke mun ádden ahte dat stuibmi mii lea leamaš SVD birra sáhttá váikkuhan dása, de hal ii sáhte gal nu ahte SVD galgá okto guoddit ovddasvástádusa ná dehálaš áššis, dadjá Stig Harby.

 

-Almmuhus-