-Almmuhus-
OĐĐASATAilu ja Mikkal leaba hutkan juoidá mii ii leat ovdal dahkkon

Ailu ja Mikkal leaba hutkan juoidá mii ii leat ovdal dahkkon

-

-

Soai leaba bargan ođđa rap-musihkain maŋemus áiggi, ja leaba vuosttažat almmuhit skearru mii lea sihke anáraš- ja davvisámegillii.

KulturSápmi digitála doaluin muitaleigga Ailu Valle ja Mikkal Morottaja ahte leaba ovttasbargame ja jagi loahpas ilbmá sudnos áibbas ođđa musihkka.

– Dat lea máilmmi vuosttaš skearru mii lea dahkkon sihke anáraš- ja davvisámegillii, muitala Valle Ávvirii.

Politihkalaš sisdoallu

Álbuma lea oassi «Sápmelaš kulturárbbi ontologalaš politihkka» prošeavttas mas leaba viežžan ideaid, man Lappi Universitehta sámedutkamuša professor Sanna Valkonen jođiha. Eará lahtut prošeavttas leat dutkit Veli-Pekka Lehtola, Sigga-Marja Magga, Áile Aikio ja Saara Tervaniemi ja dáiddárat Stina Aikio ja Marja Helander. Uyaraqk ja Juho Mudenia leaba mielde skearru buvttadeamis.

– Moai letne almmustahttimin vuosttas siŋgela, «Horagállis» digitálalaččat ja musihkkavideohámis 31.12. Nu ahte dat lea maŋiduvvon skábmamánus jagi lohppii, lohká Valle.

Máinnasteaba 

Bihtás leat guovtti ráppára muitalusat, mat laktásit fáttá dáfus olbmo siskkáldas dola buollimii ja dan hálddašeapmái.

– Horagállis lea metafora dan ipmilis dahje fámus gii eaiggáda dola dahje stoarpma elemeantta.  Ieš skearru almmustuvvá áramustá jagi 2021 loahpageahčen. Moai ráppejetne muitalan- ja máinnastanhámis iešguđetlágan dáhpáhusaid birra, mielde leat sihke árbevirolaš máidnasat, muhto maid albma ja varrasut dáhpáhusat, čilge Valle Ávvirii.

Musihkkavideo

KulturSámi digitála čoahkkimis Valle vel muitala ahte lea miellaváttishástálasaid birra, ja lea veahá persovnnalaš šuokŋa. 

Lea maiddái musihkkavideo mii ilbmá, ja mas KulturSámi oasseváldit besse oaidnit oasáža. Filmmažis leaba artisttat mielde, ja govvida dan lávlaga sisdoalu. Filmmas lea suorpmas mii addá oainnáhusaid, ja Ailu ja Amoc leaba dat oainnáhusat dego biru ja engel.

-Almmuhus-