Barentsčállingotti stivrajođiheaddji lohká iežaset vuđolaččat áigut gieđahallat guorahallama man ieža leat diŋgon.
Barentsčállingotti stivrajođiheaddji lohká iežaset vuđolaččat áigut gieđahallat guorahallama man ieža leat diŋgon.
Barentsčállingotti stivra bálkáhii geasset ovddeš váldodoaimmaheaddji Thor Woje guorahallat mo BarentsObserver galggašii doaibmat boahtteáiggis. Guorahallan lea dál gárvvis ja čájeha ahte neahttabáiki galggašii ođđasit organiserejuvvot ja ahte dat galggašii jođihuvvot redaktevrapláhkkáha mielde.
– Mii áigut duođalaččat ja vuđolaččat gieđahallat árvalusa, dadjá Barentsčállingotti stivrajođiheaddji Stig Olsen preassadieđáhusastis.
Guorahallan čielgasit ávžžuha virgádit ovddasvástideaddji redaktevrra redaktevrapláhkkáha eavttuid mielde.
Olsen deattuha ahte personealaášši Thomas Nilsen vuostá, guhte ikte lihccojuvvui váldodoaimmaheaddjin, lea gieđahallon olggobeale dan guorahallama mii lea dahkkon geasi rájes.
Loga maid: BarentsObserver váldodoaimmaheaddji lihccojuvvon
Evttoha rievdadusaid
Thor Woje guhte lea guorahallan BarentsObservera doaimma, ávžžuha ahte neahttaáviisa ain berre organiserejuvvot Barentsčállingotti vuollái, muhto dat galgá leat sierra ossodahkan man ovddasvástideaddji váldodoaimmaheaddji jođiha. Váldodoaimmaheaddjis galggašii maid leat bargoveahka- ja bargoaddiovddasvástádus iežas bargoveaga ovddas.
Woje evttoha maid ahte organiseren rievdaduvvo dainna lágiin ahte stivra virgáda váldodoaimmaheaddji, guhte rapportere njuolga stivrii, iige beaivválaš jođiheaddjái nu mo dálá vuogádagas.
– Woje lea dahkan buori ja vuđolaš barggu, dadjá stivrajođiheaddji Olsen.
Barentsčállingoddi meannuda guorahallama iežaset stivrračoahkkimis golggotmánu 23. beaivvi.
