Nu lohká Guovdageainnu demeansasearvi. Dán vahkku leat demeansabeaivvit, ja dan oktavuođas čogget ruđa váibmo- ja demeansadutkamii.
Nu lohká Guovdageainnu demeansasearvi. Dán vahkku leat demeansabeaivvit, ja dan oktavuođas čogget ruđa váibmo- ja demeansadutkamii.
Demeansabeivviid oktavuođas lágida Guovdageainnu demeansasearvi adnongálvomárkana, kaféa, čuorvvasgávppi ja vuvdet loattaid. Sii čogget ruđa váibmo- ja demeansadutkamii.
Unnán dieđut demeanssa birra
Demeansa lea dávda man dutkan ii leat vel joavdan nu guhkás ahte dasa gávdno dálkkas. Danne čogget ruđa dán vahkku.
– Mu mielas lea hui dehálaš ahte demeanssa čalmmustahttá, danne go dat lea dávda maid vaikko gii sáhttá oažžut, čilge Irene Turi.
Dehálaš oapmahaččaide
Demeansabuhcciid oapmahaččaide lea diehtojuohkin ja rabasvuohta hui dehálaš.
– Demeansa lea beare guhká leamaš tabun man birra eai huma. Olbmot dihtet beare unnán dan birra. Dan áigut mii rievdadit, lohká Turi.
Váibmo- ja demeansadutkan lea divrras, ja vai galget sáhttit joatkit, de čogget ruđa miehtá Norgga dán vahkku. Guovdageainnus lea earret eará adnongálvomárkan ja kaféa ovdalaš Bottus.
– Mii sávvat ahte olbmot háliidit doarjut min, go dát lea hui dehálaš ášši. Vai mii galgat sáhttit bissehit dán dávdda, de fertet gávnnahit mii dagaha ahte olbmot ožžot demeansa, loahpaha Guovdageainnu demeansasearvvi jođiheaddji, Inger Marie Bongo Eira.