-Almmuhus-
-Almmuhus-
-Almmuhus-
OĐĐASATÁigu ovttatmanos vuoruhit buollingearggusvuođa ášši

Áigu ovttatmanos vuoruhit buollingearggusvuođa ášši

-

-

Kárášjoga sátnejođiheaddji áigu deaivvadit buollindoaimmahagain nu jođánit go vejolaš, ja gávdnát čovdosiid vai eai manat buollingearggusvuođa gielddas.

Kárašjoga sátnejođiheaddji Svein Atle Somby (Bb) lohká lea duođalaš ášši jus geavvá ahte gielda báhca buollindoaimmahaga haga.

– Mii gieldda bealis, ovttas gieldda hoavddaiguin ja hálddahusain fertet čoahkkanit ja ságastallat buollindoaimmahagain ja geahčadit hástalusaid ja gávdnat čovdosiid hástalusaide.

 

Hoahppu

Sátnejođiheaddji Somby lohká ii leat buorre go buollindoaimmahat lea šaddan dákkár dillái, ja dáhttu oažžut gáddái ođđa šiehtadusa.

– Dat ášši ferte vuoruhuvvot, go dáinna lea hoahppu ja mii berret dan dáhkat ovdal sotnabeaivvi, lohká son.

 

Váilevašvuođat

Kárášjoga buollindoaimmahat lea golggotmánus cealkán eret šiehtadusa gielddain, ja boahtte sotnabeaivvi ii leat šat buollindoaimmahat geatnegáhtton čáskadit jus buollá.

Sii leat geahččalan oččodit ođastit šiehtadusa Kárášjoga gielddain jagi 2007 rájes, muhto eai vel ožžon. Buollindoaimmahaga bealis oaivvildit maid dálá šiehtadusas, leat ollu váilevašvuođat ja sii leat dál dolkan go álo leat ákkat ahte ii leat áigi dahje dilli daid dáhkát.

 

Eai dovdda váldot duođalaččat

Buollindoaimmahat leat cealkán eret šiehtadusa earret eará go sis váilu jođiheaddji.

Sii oaivvildit ahte Dearvvašvuođa, biras ja sihkarvuođa vuogádagat ii gávdno, earágo gieldda iežaset dearvvašvuođa, biras ja sihkarvuođa-čoakkáldat mii ii leat ođastuvvon.

Sii eaige dovdda iežaset váldot duođalaččat gieldda bealis go eai váldo mielde ráđđádallamiidda mii guoská buollindoaimmaháhkkii, ja dat addá dovdu ahte sii gullet olggobeallai gieldda.

 

Loga maid: Eai vuolgge čáskadit jus buollá Kárášjogas

 

Bajimus bearráigeahčču

Lea Buollin- ja El-sihkkarvuođa direktoráhta geas lea fágalaš váldi ja lea bajimus bearráigeahččoorgána gielddalaš buollindoaimmahagain. Ávvir lea leamaš oktavuođas singuin dán áššis, muhto doppe eai lean gergosat vástidit.

 

-Almmuhus-