-Almmuhus-
-Almmuhus-
OĐĐASATÁigu «Lavo» appain olahit olles máilmmi

Áigu «Lavo» appain olahit olles máilmmi

Journalista

-

-

Mobiltelefuvdna-appain, masa inspirašuvdna boahtá lávu muitalusain, áigu son olahit olles máilmmi.

Tom Roger Sokki, geas lea sámi duogáš Guovdageainnus gos su áhčči lea eret, lea hutkan mobiltelefuvdnii appa mainna geavaheaddjit sáhttet filbmet mobiltelefuvnnain oanehisfilmma, ja bidjat musihka dasa ja juogadit dan.

Dán rádjái lea sihke Paradise hotel TV-ráidu geavahan appa, ja dál maiddái Norgga russat.

– Dán rádjái lea dat leamašan erenoamáš somás mátki, ja orru dego niehku, lohká Sokki NTB:i.

 

Fárrui sámi duogáža

Son lea gohčodan appa «Lavo», mii boahtá lávvu-sánis.

– Go juo ieš álggahin juoidá, de lei munnje lunddolaš váldit fárrui oasi iežan sámi duogážis. Appa ulbmil lea juogadit ealli govaid ja buriid fearániid, ja dan seamma lea lávus dahkat, ja danne heivii nammadit appa «Lavo», muitala Sokki Ávvirii.

 

– Mii lea erohus dán appas ja earáin mat fállet sullásaš bálvalusa, nu movt ovdamearkka dihte Snapchat, Instagram ja Facebook?

– Dat mii min earuha lea ahte mii ovttasbargat TV kanálaiguin ja Youtubas daiguin buriid historjjámuitaleddjiiguin, geat eai vel dine ruđa. Min ulbmil lea hutkat singuin ovttas fitnodatmálle, ja mii bargat dál dan vuostá ahte «Lavo» galgá šaddat máksin-appan. Mis ii leat nu dehálaš vuos dinet ruđa, ja bargat dainna ahte čoavdit hástalusaid maid márkan gáibida. Mus lea jáhkku ahte mii nákcet dan ja maid ahte gávdnojit olbmot geain lea dáhttu máksit dan buori sisdoalu ovddas, lohká son ja muitala sis leat maiddái vuoigatvuođat artisttaid musihkkii, maid geavaheaddjit besset atnit go ráhkadit filmmaid, ja dat ii leat Instagramas ja Facebookas.

 

Nuorravarat jálluvuohta

Jurdda álggahit ja ovdanáhttit appa bođii das go Sokki lea ollu jagiid bargan mediaásahusain ovdánahttit mobiilačovdosiid ja videogieđahallama.

– Lean bargan njeallje jagi TV2,TV3 ja TV Norge ovddas, ja go rivde TV geahččandábit, ahte olbmot eai geahča šat dábálaš TV, ja eanet háliidedje mobiilas geahččat ealli govaid, de eai nagodan medieásahusat dustet dan.

– Mun jurddašin, gal mun sáhtán dahkat dan. Nuorravarat jálluvuođain ledjen 2000-logus 25-jahkásažžan álggahan fitnodaga gos ráhkadeimmet riŋgenjienaid ja logoid mobiltelefuvnnaide Norggas, ja dat lihkostuvai issoras bures.

 

Reaidun TV-ráiddus

«Lavo» almmuhuvvui ge Paradise Hotel TV-ráiddu oktavuođas, ja dán rádjái leat 30 000 olbmo lásten appa.

– TV-kanálas leat leamaš váttisvuođat olahit iežaset gehččiid, ja nu stivret gulahallama. Paradise Hotel lea hui bivnnut nuoraid gaskkas, ja go oasseváldit juogadit filmmažiid appain, de oidnet geahččit daid ja nu šaddá buot eanet persovnnalaš, lohká son.

 

Russain ovttasbargu

Dál lea Sokki maid dahkan šiehtadusa dán jagáš russaiguin.

Miessemánu 1. beaivvi sáddii Sokki SMS-dieđu dán jagáš russaide, oažžut sin filbmegoahtit ja juogadit filmmažiid appa bokte.

– Vajálduhte Snapchat ja Instagram, dat lea «Lavo» mii lea dán jagáš russakanála, ja dat mii dahká dán vel somábun, lea go sii geat eai leat russat besset čuovvut mii dáhpáhuvvá, lohká Tom Roger Sokki NTB:i.

 

Gilvu russaide

«Lavo» ruhtada máŋga russabusse ja buot russavideoid gaskkas mat lástejuvvojit appii, válljejuvvo vuoiti miessemánu 18. beaivvi.

Vuoitu lea mátki Ibizai.

– Midjiide lea hui erenoamáš ahte russat vuohččan háliidit duođaštit russaáiggis sierra mediuma bokte. Mis sáhttet filmmaide bidjat iežaset russalávlagiid, juoga mii buktá ođđa dimenšuvnna ávvudeapmái, lohká son.

 

Almmuhit riikkaidgaskasaččat

Sokki muitala ovddasguvlui lea sis álggos fokus Norgga márkanii, ja oažžut dan doaibmat albma ládje.

– Dan maŋŋel lea mis mihttu čavčča mielde viidut Skandináviai, ja jurdda lea ahte galgat leat gergosat almmuhit appa riikkaidgaskasaččat jagi 2018 mielde, muitala Sokki.

 

 

 

 

 

 

-Almmuhus-