Ovddádusbellodat ovddida odne árvalusa Stuoradiggái. Áigot ođasmahttit ja ložžet mohtorjohtolatlága.
Ovddádusbellodat árvala ahte Stuoradiggi ávžžuha ráđđehusa gávdnat vuogi movt suohkanat besset hálddašit mohtorjohtolatlága, vuogi mii sihkkarastá ollislaččat iešmearrideami mohtorjohtolatlágas.
Nordkalottfolket lea juo gieskat ožžon Romssa ja Finnmárkku fylkkadikki doarjut ávžžuhusa ođastit dan lága.
Ovddádusbellodaga stuoradiggeáirras Bengt Rune Strifeldt lohká Altaposten aviisii ahte sii áigot sihkkarastit ollislaš báikkálaš iešmearrideami mohtorjohtolahkii. Son moaitá dálá lága man lohká earret eará hehttet vuodjimis čuoiganlahtuid Davvi-Romssas ja Finnmárkkus maŋŋel miessemánu 5. beaivvi.
– Muhtin jagiid lea maid dievas dálvi eanas miessemánu, ja nu go diehtit de ellet eallit luonddu mielde eai ge kaleandara. Norga lea maid bázahallan ránnjáriikkaid dáfus ja galggašii čuovvut Ruoŧa ovdamearkka gos skutervuodjin lea olu friddjabut, dadjá Strifeldt aviisii.
