Johtolatministtar Knut Arild Hareide čujuha raportii maid Stáhta geaidnodoaimmahat ja Dearvvašvuođadirektoráhtta leat ráhkadan.
– Johtolagas galgá leahkit oadjebas. Lea dehálaš gáibidit dearvvašvuođaduođaštusa vuorraset biilavuddjiin, sihkkarastindihte ahte sii leat dorvvolaččat johtolagas. Mis ii lean vejolašvuohta heaittihit dáid gáibádusaid borgemánu 1. beaivvi rájes, nu movt Stuoradiggi lei ávžžuhan, dan sivas go eat lean ožžon dehálaš fágalaš árvvoštallamiid dan mearrádussii. Dál lean ožžon daid árvvoštallamiid ja munnje lea ášši čielggas. Mun áiggun ain gáibidit geatnegahtton dearvvašvuođaduođaštusa, dadjá johtolatministtar Knut Arild Hareide.
Stáhta geaidnodoaimmahat ja Dearvvašvuođadirektoráhtta leat guorahallan makkár vejolaš váikkuhusaid dat buvttášii jus heaitá gáibideame geatnegahtton ahkemearriduvvon dearvvašvuođaduođaštusa biilavuddjiin. Leat maid guorahallan makkár eará vejolaš doaibmabijuid sáhttá bidjat sadjái.
Eai gávdno buoret ortnegat
Raporttas boahtá ovdán ahte Stáhta geaidnodoaimmahat oaivvilda leat jáhkehahttin ahte johtolatdorvvolašvuođa riska stuorru jus geatnegahtton dearvvašvuođaduođaštus váldo eret. Stáhta geaidnodoaimmahat árvvoštalla maid ahte eai gávdno eará vejolaš ortnegat mat leat seamma heivvolaččat fuobmát sin geat eai deavdde dearvvašvuođagáibádusaid.
