Ovddit jagi faskejedje bronšša, diibmá ges silbba nu ahte dán jagi lea gánddaiguin doaivva vuoitit olles Altaturneringa.
Ovddit jagi faskejedje bronšša, diibmá ges silbba nu ahte dán jagi lea gánddaiguin doaivva vuoitit olles Altaturneringa.
Nordlys G16 joavku, mii Norway Cupas vuittii B-finála, lea ihttin vuosttaš čiekčan Hammerfeastta Hif/Stein joavkkuin. Joavkkuin čikčet 15/16 jahkásaš gánddat..
Kirsten Inger Anti geas čiekčá gánda, Frank Ailo Anti Tangen, Nordlysa gándajoavkkus, lohká čikčiin leat alla vuordámušaid sihke ievttá čiekčamii ja Altaturneringa čiekčamiidda obbalohkái.
– Ovddit jagi faskejedje bronšša, diibmá ges silbba ja gánddat lohke dalle jo ahte dán jagi gal fertejit de vuoitit. Nu ahte sis leat vuordámušat guhkás olahit dán jagi čiekčamiin, čilge eadneolmmoš.
Ihttá čiekčamiid jáhkket maid vuoitit.
– Mis leat stuorra vuordámušat go nu bures manai Norway Cupas, muhto Hif/Stein lea gal buorre joavku. Mii eat dieđe vuos makkár joavkkuin sii bohtet, muhto gánddat jáhkket birget. Lohket áigut bátnegáskke čiekčat ja ražastit vuoitit, čilge Anti.
Vuite 14-1
Ievttá ráidočiekčan dáidá maid buoridan nuorra gánddaid iešdovddu, ikte deaivvadedje oainnát Ákšuovuona joavkkuin, dán čiekčama vuite kárášjohtgánddat 14-1.
– Čiekčit leat diehttelasat hirbmat movttegat, mis ledje unnán dábálaš hárjehallamat ovdal Norway Cupa muhto daid čiekčamiin ja ievttá ráidočiekčamis lea leamaš ávkin, čaibmá Anti.
–Manne son Nordlysas lea nu buorre gándajoavku?
– Kárášjogas leat álot leamaš buorit čiekčit mat čikčet dál eará joavkkuid ovddas, in dieđe boahtá go das go lea smávva báiki, vai hárjehallamiin vai mas dat bođeš.
Ja jus leat beroštuvvan geahččat ihttá čiekčama gaskkal Nordlys G16 ja Hif/Stein de dat lea diibmu 10.40 FRE01 A šilljus.
Dasa lassin deaivvada Nordlys maiddái Guovdageainnuin ihttin.
– De lea vuot dat «duoddara soahti» man olbmot lávejit hoahkat, sin vuostá jáhkkit maid birget, dadjá Anti.
Ledje maid Norway Cupas
Maiddái Hif/Steinas ledje joavkkut dán jagáš Norway Cupas, gos nubbi joavku faskii bronšša. Dát joavku dattege ii deaivvat Nordlys G16 joavkkuin Altaturneringas.
Hif/Stein 99-joavkku hárjeheaddji Jarle Bjørgve čilge ahte dušše okta dain gánddain geat čikče Norway Cupas sin ovddas, čiekčá ihttin dan joavkkus mii deaivvada Nordlysain.
– Mis leat guokte gándajoavkku, 00-joavku, mii ihttin deaivvada Nordlysain, ja de lea vel 99-joavku mii lei Norway Cupas. Ja dan 00-joavkkus lei okta čiekči min mielde Norway Cupas, čilge Bjørgve.
