-Almmuhus-
-Almmuhus-
OĐĐASATÁigot váidit Nussir-mearrádusa Gonagassii Stáhtaráđis

Áigot váidit Nussir-mearrádusa Gonagassii Stáhtaráđis

-

-

– Ealáhusministtar duolbmá áitojuvvon ja hui noađuduvvon mearrasámi ja boazosámi beroštumiid go addá Nussir ASA:i lobi roggat veaikki Nussiris, mii lea oanehis áiggi ruvkeprošeakta, dadjá sámediggepresideanta Aili Keskitalo.

*/

Sámediggepresideanta lohká Sámedikki áigut váidit mearrádusa nu johtilit go lea vejolaš.

– Sámediggi áigu váidit mearrádusa Gonagassii Stáhtaráđis, dadjá Aili Keskitalo preassadieđáhusas.

Presideanta ii ge jáhke ahte duođalaš aktevrrat bidjet ruđaid prošektii, go vuosteháhku sámi servodagas lea nu stuoris.

 

Ráđđelahttu beahtahallan

Sámediggeráđđi Silje Karine Muotka lea sakka beahtahallan mearrádusa geažil man Ealáhus- ja guolástusdepartemeanta lea dahkan.

– Ruvki váldá eallima vuonas ja rihkku boazodoalu vuođu guovllus, dadjá Muotka.

 

Fágaetáhtat vuosttaldan

– Stáhta iežas fágaetáhtat, Guolástusdirektoráhtta ja Mearradutkaninstituhtta, vuostálastet plánaid, danne go ruvkedoaibma billista iešguđege guliid deahálaš gođđan- ja ahtanuššanguovlluid Riehpovuonas, ja danne rihkku ja gieldá sámi kultuvrra kulturvuođu guovllus gos lea juo stuorra áitta, dadjá Silje Karine Muotka.

 

Billista vuona

Nussir ASA oaččui 2016 loahpas luoitinlobi ásahit mearraduvnni Riehpovutnii nuoskkidanlága mielde.

Ealáhus- ja guolástusdepartemeanta lea dál meannudan doaibmalobi minerálalága mielde, ja lea addán Nussir ASA:i doaibmakonsešuvnna minerálalága mielde.

– Mearraduvdni billista olles vuona máŋggaid sohkabuolvvaid badjel, ja billista riddo- ja vuotnabivddu mii lea ahtanuššamin bures, ja dat lea dohkketmeahttun, dadjá Muotka.

 

Áitá boazodoalu

Váikkuhančielggadusat čájehit ahte johtingeainnut ja guoddinsajit billašuvvet ruvkedoaimma geažil Nussiris ja Gumpenjunis Fálesnuori gielddas.

Dát čuohcá buot bearrašiidda, ja sáhttá ahte fertejit heaitit boazodoaluin, danne go lea veadjemeahttun bargat ceavzilit ja ekonomalaččat gánnáhahtti boazodoaluin guovllus, oaivvildit Sámedikkis.

– Sihke Stáhta boazodoallohálddašeapmi, Norgga Boazosámiid Riikasearvi (NBR) ja orohagat dadjet ahte lea veadjemeahttun bargat boazodoaluin guovllus, vaikko biddjojuvvojit eavttut váidudeaddji doaibmabijuide, man lágan gelbbolašvuođa lea Ealáhus- ja guolástusdepartemeanttas ahte oaivvildit juste nuppe láhkai, dadjá Silje Karine Muotka.
 

 

Ii várra leat servodatekonomalaččat gánnáhahtti

Muotka lea maiddái hui kritihkalaš go Ealáhus- ja guolástusdepartemeanta ii leat dahkan makkárge servodatekonomalaš analysa ruvkedoaimmas.

Departemeanta ii ge lea árvvoštallan makkár váikkuhusat ovddeš ja plánejuvvon duohtademiin lea guovllu boazodollui.

– Mii oaidnit ahte prošeakta ii várra leat servodatekonomalaččat gánnáhahtti ja Ealáhus- ja guolástusdepartemeanta guođđá riskka boahttevaš sohkabuolvvaide ja sámi kultur- ja ealáhusbargiide, loahpaha son preassadieđáhusastis.

*/

-Almmuhus-