Johtalusdepartemeanta lea bidjan johtui barggu mas áigot sihkkarastit ahte girdifálaldat gaskal Evenášši ja Bådåddjo joatká.
Widerøe mearridii álgojagis ahte sii heaittihit sin girdifálaldaga gaskal Evenášši ja Bådåddjo miessemánu 4. beaivvi rájes. Koronadilli dattege dagahii ahte maŋemus girdi dán gaskka manai cuoŋománus juo.
Girdifálaldat dán guovllus lea dehálaš sihke ássiide ja ealáhussii, muhto maiddái Suodjalussii. Danne šaddá dát girdifálaldat oassin nu gohčoduvvon LOT ortnegii, mii mearkkaša ahte stáhta ráhkada kontrávtta girdifitnodagain dán girdiruvttos, čállá johtalusdepartemeanta preassadieđáhusas. Girdifitnodagat buot EØS-riikkain bovdejuvvojit addit doaibmafálaldaga dán girdiruktui.
Almmuhit gilvvu
Ođđa soahpamuš doaibmagoahtá ođđajagimánu 1. beaivvi 2021 rájes, ja gilvu almmuhuvvo ovdal geasi.
– Áibmojohtolat lea hirbmat dehálaš fievrridanvejolašvuohta Norggas. Widerøe lea dál heaittihan iežaset kommersiála girdifálaldaga gaskal Evenášši ja Bådåddjo. Dát váikkuha ollu aktevrraide Hársttáin ja Áhkánjárggas, ja lea earenoamáš dehálaš ahte gávdno doaimmalaš oktavuohta Áhkánjárgga ja Bådåddjo gaskal, mii lea fylkkaoaivegávpot. Danne áigut mii almmuhit gilvvu masa sáhttá buktit kommersiealla fálaldaga girdiruktui gaskal Evenášši ja Bådåddjo, ja sihkkarastit buori girdifálaldaga sihke priváhta olbmuide ja ealáhussii guovllus, dadjá johtolatministtar Knut Arild Hareide.
