-Almmuhus-
-Almmuhus-
-Almmuhus-
OĐĐASATÁigot seailluhit ja ealáskahttit árbevirolaš juoigama

Áigot seailluhit ja ealáskahttit árbevirolaš juoigama

-

-

Luohteberošteaddjit áigot álggahit searvvi. Juoigalasat searvi galgá seailluhit, ovddidit ja ealáskahttit árbevirolaš juoigama, sihke dološ ja dán áigahaš luđiid.

Luohteberošteaddjit miehtá Sámi háliidit cegget searvvi mii seailluha, ovddida ja ealáskahttá árbevirolaš juoigama. Olbmot buot agiin, miehtá Sámi, leat bures boahtimat searvat.

 

Buohkat leat bures boahtimat

Vihtta olbmo leat plánegoahtán Juoigalasaid searvvi álggahančoahkkima. Okta sis lea Nils Johan Gaup. Beassat mielde Juoigalasaid searvái eai leat makkárge eavttut. Beare liikot juoigat, ja lea beroštupmi, de leat bures boahtin searvat.

 – It dárbbat goasse lávddi alde juoigan, it ge dárbbat juoigat lávddi alde jus it hálit. Beare dus lea luohteberoštupmi, ja liikot juoigat, de áinnas searvva dán searvái,

muitala son.


Luohteberošteaddji, Nils Johan Gaup.
Govven: Nils Johan Vars

Ealáskahttit árbevirolaš luđiid

Okta ulbmiliin servviin lea ealáskahttit ja ovddidit árbevirolaš luđiid.

– Dán áigge ii gullo šat nu olu árbevirolaš juoigan. Danne mii háliidit geahččalit ealáskahttit árbevirolaš juoigama, lohká Nils Johan.

– Vaikko mis lea dat ulbmil, de ii mearkkaš ahte mii eat juoigga dán áigahaš luđiid, go dan gal maid sáhttit.

 

Gávnnadit juoigama váste

Nubbi ulbmil lea oažžut olbmuid juoigan eambbo. Danne háliidit maiddái lágidit deaivvademiid, gos dušše humadit ja juoiggadit.

– Mii háliidit gávnnadit juoigama váste, oahppat luđiid nubbi nuppis, ja nu beassat buohkat eambbo juoigat.

 

Ávžžuha olbmuid searvat

Odne lea Juoigalasaid searvvis álggahančoahkkin Alfreds Kroas Guovdageainnus. Doppe dahkko mearrádus das leat go doarvái luohteberošteaddjit ahte sáhttet álggahit dán searvvi.

– Mun gal ávžžuhan olbmuid boahtit dán čoahkkimii. Dál mii leat dušše viđas geat plánet dán čoahkkima, muhto doppe galgá válljejuvvot earret eará stivra searvái. Stivra galgá de ain plánet viidáset. Ii leat ahkemearri searvat dása, nu ahte buohkat buot agiin leat bures boahtimat, loahpaha Nils Johan Gaup.

-Almmuhus-