NordNorsk Reiseliv AS lea ohcame oasseváldiid geat háliidit oahppat mátkeealáhusa birra ođđa sámi mátkeealáhusprošeavttas Davvi-Norggas mii bistá golbma jagi.
NordNorsk Reiseliv AS lea ohcame oasseváldiid geat háliidit oahppat mátkeealáhusa birra ođđa sámi mátkeealáhusprošeavttas Davvi-Norggas mii bistá golbma jagi.
– Njukčamánu 1. beaivvi álggahii NordNorsk Reiseliv (NNR) ođđa sámi mátkeealáhusprošeavtta. Sámediggi, Nordlándda, Romssa ja Finnmárkku fylkkagielddat, ovttas Innovašuvdna Norggain leat dorjon prošeavtta ruđalaččat. Prošeavtta váldooasit leat gelbbolašvuođalokten, máhttobuvttadeapmi, fierpmádatbargu ja márkanfievrredeapmi, muitala NordNorsk Reiseliv preassadieđáhusas.
Turisttat ohcalit kultuvrralaš vásáhusaid
Márkanat rivdet. Lea álkit dál mátkkoštit. Turisttat lassánit ja ohcalit sisdoalu main leat vásáhusat. Seamma ohcaleapmi lea kultuvrralaš vásáhusaide. Dasa lassin leat mátkkošteaddjit ieža maid álgán muitalit mátkkiid birra sosiála mediaid bokte. Dan dihte lea ieš vásáhus šaddan stuora oassin márkanfievrredeamis – ja dan dihte ferte buktagiid nannet vai Davvi-Norgga namma boahtá buorebut ovdan.
Ovdánahttet fitnodagaid
Lea šaddan dehálažžan hukset Davvi-Norgga nama buriid buktagiiguin. Sámi Mátkeealáhus 2.0 mihttu lea nannet árvoháhkama oassálasti fitnodagaiguin ja systemáhtalaččat ovdánahttit fitnodaga gelbbolašvuođa ja buktaga. Lassin ferte álkidit beassat márkaniidda ja buoridit beasatlašvuođa. Lea dehálaš oažžut eanet profeššunealla, sámi mátkeealáhusbuktagiid mat leat dehálaččat go galgá ovddidit Davvi-Norgga nama, čuožžu preassadieđáhusas.
Bovdeme mátkeealáhusaid fárrui álggaheapmái
NordNorsk Reiseliv lea virgádan Nina Smedseng prošeaktajođiheaddji 100 proseantta virgái. Prošeakta lea álgosajis ja čohkkeme osiid sadjái, ja doallá jođihanjoavkočoahkkima miessemánus.
Jođihanjoavkkus galget máŋga sámi mátkeealáhusfitnodagat leat fárus, ja galget láidesteaddjin ovttas NNR:in bidjat vuođu prošeavtta bargui.
– Mun lean dál ohcame ja kárteme geat sáhttet leat vejolaš prošeaktaoasseváldit Davvi-Norggas geat šaddet vuođđun prošektii. Lulli-Sámi fitnodagat bovdejuvvojit maid searvat osiide prošeavttas, muitala prošeaktajođiheaddji Smedseng preassadieđáhusas.
Prošeakta dárbbaša doaimmalaš oasseváldiid geat háliidit oahppat mátkeealáhusa birra dutkama, fierpmádatbarggu ja gelbbolašvuođa loktema, vai nanne mátkeealáhusfálaldaga árvoháhkama. NordNorsk Reiseliv searvá Kulturealáhuskonferánsii mii lágiduvvo Guovdageainnus njukčamánu 15. ja 16. beaivvi.
