UiT- Norgga árktalaš universitehta ekspedišuvdna mii áigu rasttildit Kalaalit Nunaat jiehki, lea juo Ilulissat báikkis oarjjabeal Ruonáeatnama. Miessemánu 19. beaivvi dollejit mátkái man ulbmil lea gaskkustit Árktiisa luonddudieđa ja historjjá.
– Lea erenoamáš vejolašvuohta gaskkustit ekspedišuvnna movtta, stuorra beroštumi dan erenoamáš lundui, dehálaš oasi Norgga historjjás ja dan erenoamášvuođa Ruonáeatnama jiehkis man birra lea dehálaš diehtit jus galgat áddet boahtteáiggi dálkkádatovdáneami ja áhpečázi dulvvis, lohká UiT rektor Dag Rune Olsen UiT preassadieđáhusa bokte.
UiT – Norgga árktalaš universitehta lágida dán gaskkustanekspedišuvnna ja ekspedišuvnna jođiheaddji lea historihkkár Harald Dag Jølle. Gonagaslaš Allavuohta Kruvdnaprinsa Haakon lea mielde ekspedišuvnna oasseváldin. Ulbmil lea gaskkustit vásáhusaid ja dieđu Kalaallit Nunaat /Ruonáeatnama ja Árktisa birra.
– Mii čuovvolat dađistaga váttisvuođaid mat leat áigeguovdilat dain guovlluin gos mii mátkkoštit, lohká historihkkár Harald Dag Jølle.
Njunnošis lea ságastallan Ruonáeatnanlaš Kunuk Lennertin, maiddái Easŧgrip dutkanstašuvnna dutkiiguin ja Dánmárkku Siriuspatrulla soalddáhiiguin Daneborg váldobáikkis. Ekspedišuvdna dolle vuos kite vugiin ja čuoigga rastá jiehki nuortabeallái sullo Daneborg báikái. Kruvdnaprinsa lea mielde dán ekspedišuvnna oasis. Ekspedišuvnna oassálastit čuvvot rittu davás mealudettiin kajahkain ja galledit báikkiid gos norgalaš meahcásteaddjit leat bivdán dálvviid 1918-1940 áigodagas, earret eará beakkálmasat nugo Helge Ingstad, Henry Rudi ja John Giæver.
