Guovdageainnu márkan lea buot rohttuluvvon ja suohkanis lea dál áigumuš oažžot njáskot bálgáid, vai johtolatsihkkarvuođa dilli buorrána.
Guovdageainnu márkan lea buot rohttuluvvon ja suohkanis lea dál áigumuš oažžot njáskot bálgáid, vai johtolatsihkkarvuođa dilli buorrána.
Guovdageainnu suohkan lea ožžon 24000 ruvnno Stáhta geaidnodoaimmahagas ja Finnmárkku fylkagielddas njáskat rođuid lagasguovlluin ja ássanguovlluin.
Guoskka buot vánddardeddjiide
Guovdageainnu suohkana teknihkkalaš ossodaga jođiheaddji Sindre Murud muitala sii áigot vuoruhit njáskat bálgáid guora gaskal ássanguovlluid ja báikkiid gokko olbmot lávejit njulget.
– Dás lea sáhka johtolatsihkarvuođa birra, mii guoskka buohkaide geat vánddardit. Dat guoská biillaide, sihkkelastejeddjiide ja vázzi olbmuide.
Šaddá eanet várddus
Murud lohká deháleamos njáskamiin lea ahte šaddá várddus ja vánddardeaddjit oidnet nubbi nuppi.
– Mii áigut maiddái skohterláhtuid guora njáskat márkanbáikkis, ja bálgáid mat mannet geainnuid láhkká. Go lea čorges bálggis de han olbmot válljejit dakko vánddardit dan sadjái go biilageainnu mielde, ja dat ovddida johtolatsihkarvuođa buohkaide, lohká son.
Dárbu cavgilemiide
Murud čilge sii čorgejit ja njásket bálgáid ja geainnuid guora jahkásaččat, muhto dan eai mearkkaš olbmot ovdal go eai daga dan.
– Olbmot gal fuomášit ovttatmanos jus ii njásko ja lea rohttuluvvon, nu ahte danne mii dárbbašit ge cavgilemiid suohkan ássiin guđe gos livčče dárbu njáskat. Luoddaguora gal leat bálkáhan eará fitnodaga njáskat, muhto bálgáide lea dárbu olbmuin oažžut cavgilemiid, lohká son.
Fállet mohtorsearvái
Murud lohká ii leat nu ollu ruđas sáhka, ja ii dainna olát buot njáskat, muhto álgu dat lea. Son muitala suohkan áigu fállat njáskanbarggu Guovdageainnu mohtorsearvái.
– Mii jurddašit sii sáhttet eaktodáhtolaččat čorget máđijaid, ja ožžot de dan ruđa suohkanis.
Buorren buohkaide
Guovdageainnu mohtorsearvvi nubbinjođiheaddji Anni Rauna Triumf ii leat gullán ášši birra, muhto lohká iežas bealis ahte áigu váldet fálaldaga njáskat.
– Dat gal lea buorre sáhka, go das han lea buohkaide vuoitun. Das šaddet čorges bálgát, mii lea buorren sihke johtolatsihkarvuođa ektui márkanolbmuide, ja maid min gussiide geat eai soaitte leat nu oahppas bálgáin dáppe. Ja dieđusge buktá ruđa min searvái, lohká Triumf.
Vaikko son ii sáhte okto mearridit váldet go barggu, de áigu váikkuhit nu ahte sii váldet dien fálaldaga.
