Dán lávvordaga lea stuora vuojadanbeaivi ovccát geardde Skániin go áigot geahččalit norgga olahusa nagodit ja čohkket eanemus vuojadeddjiid.
Dán lávvordaga lea stuora vuojadanbeaivi ovccát geardde Skániin go áigot geahččalit norgga olahusa nagodit ja čohkket eanemus vuojadeddjiid.
Badjelaš čuođi olbmo leat dieđihan searvat vuojadeapmái galbma mearas Viervvás, Skánit suohkanis, ja ain lea sadji eambbogiidda. Fysioterapevtta Berit Anne Hætta Reinås lea okta lágideddjiin, ja sii áigot geahččalit váldit Norgga olahusa dán lávvordaga. Jus dan galget nagodit, de fertejit čohkket unnimusat 325 olbmo, vai časket ovddit olahusa mii dahkkui Larvikas. Olbmuide lea ain vejolaš dieđihit mielde, ja oažžu vel unna skeaŋkkažiid go searvá.
Rájiid botket ja ruhtavuoitu
– Mokta lea issorasat loktanan dáidda doaluide dál, ja leat ollugat geat dorjot doaluid. Lea ruhtavuoitu mii lea 5000 ruvnno dan searvái gii nagoda eanemus miellahtuid oažžut njuikestit merrii dán lávvordaga, muitala fysioterapevta gii lea badjelaš 12 jagi áigi go ieš álggii vuojadit galbmamearas.
– Lea hui buorre duosttat vuojadit galbmačázis, go de botke iežas rájiid ja šaddá duostileabbo. Lea buorre olbmo ovdáneapmái, lohká Reinås Ávvirii.
Ovttastallan buorre
Dálkediehtu ii oro nu heitot lávvordahkii, go iská maid meteorologa dieđiha.
– Sávan ahte dálki šaddá buorre lávvordahkii, dadjá jiekŋavuojadeaddji Reinås, gii lea ovttas earáiguin vuojadan mearas juohke bearjadaga maŋŋel barggu.
Dalle lei Reinås čohkken sihke sátnejođiheaddji, báhpa, doaktára ja dearvvašvuođadivššára, ja nu sii álge galbmamearas vuojadit. Oassálastit lassánedje, ja jurdda vulggii sullii logi jagi dás ovdal, álggahit dakkár oktasaš beaivvi mas olbmot fárrolaga njuikejit merrii Skánit suohkanis. Viervvá gilis lea ráhkaduvvon sáttogáddi gos vuojadeapmi lea.
– Ja mii leat hui oadjebasat go báhppa lea mielde vuojadeame, leaikkastallá Reinås.
Vuolgga
Lávvordaga álgá vuojadeapmi diibmu 12:is maŋŋel go leat liekkadallan vai liegganit bures. Dalle bijadit sii viega merrii dan botta go musihkkakorpsa čuojaha fanfare, ja árvideames leat seamma jođánat bajás gáddái fas. Dáhpáhus ii biste nu guhká, ja čoaggá ge ollu gehččiid geahččat daid duostilis vuojadeddjiid. Geahččit lávejit leat eanet go sii geat vuojadit.
– Lea ollu álkibut gálistit čáhcái go leat ollugat fárus ja dalle ii oro čáhci nu galmmas, muitala Berit Anne Hætta Reinås.
Vuoittuid juohkin lea diibmobeali maŋŋel go leat fitnan mearas.
Eahketdoalut vel
Eahketbeallái leat doalut ja rukses-rátnu Skånlandhallenis. Doppe lea biebmu, ja dovddus artistat nu go Dennis Storhøi, Cecilia Vennersten, Tom Mathisen ja earát. Dáidda doaluide fertii ovdalgihtii dieđihit iežas.
