Sámiráđđi lea álggahan prošeavtta mas áigot suddjet Sámi duoji ja kultuvrra, na ahte olggobeale olbmot eai galgga ávkkástallat dan.
Sámiráđđi lea álggahan prošeavtta mas áigot suddjet Sámi duoji ja kultuvrra, na ahte olggobeale olbmot eai galgga ávkkástallat dan.
Sámiráđđi lea dál álggahan prošeavtta man ulbmilin lea guorahallat duoji juridihkalaš suoji dárbbuid ja hutkat čovdosiid duoji suddjemii. Sámediggeráđđi lea juolludan 500 000 ruvnno Sámiráđi bargui maid dat lea álggahan Sámi duoji gálvo- ja kvalitehtamearkka ođasmahttimiin. Ulbmilin lea gávdnat juridihkalaš suoji mii livččii ávkkálaš sámiide ja heivešii olles Sápmái ja sámi ealáhusaide.
Dollagáttis ságastallat
Sámiráđi Márja Katarina Påve muitala prošeavtta oktavuođas sii bovdejit olbmuid čoahkkimiidda gullat Sámiráđi duodjeprošeavtta birra ja ságastallat duoji suddjema dárbbuid ja hástalusaid.
– Mii doallat golbma nu gohčoduvvon dollagáddeságastallamiid, mii lea eahpeformálalaš ságastallanvuohki, gosa bohtet duojárat, eallilan olbmot ja studeanttat humadit makkár dárbbut leat dujiid suddjemis, lohká Påve.
Golbma čoahkkima
Vuosttaš čoahkkin lea boahtte duorastaga diibmu 17:00 Sámi Duoji dálus Johkamohkis, nubbi lea Guovdageainnus ja maŋemus Anáris. Dutki Piia Nuorgam, gii lea čállime doavttirgráda álgoálbmogiid kulturárbbi suodjaleami birra, lea mielde prošeavttas ja oassálastá ságastallamiiguin.
– Mii beassat gullat movt eará álgoálbmogiin leat suodjalan kulturárbbi, ja buohtastahttit sámiiguin, lohká Påve.
Olggobeale olbmot ávkkástallet
Turisma ja dasa laktáseaddji bálvalusat levvet ain viidáseappot Sámis. Seammás Sámi duoji ja kultuvrra leat olggobeale olbmot ávkkástallan turismmas ja eará buktagiin jo máŋgalogi jagi.
– Norgga bealde ii leat gilvu dan ektui ahte olggobeale olbmot ávkkástallet sámi kultuvrra, nu movt Suomas, ja veaháš Ruoŧas. Das guorahallat maid daid eará sámi ealáhusaid, nu go ovdamearkka dihte biergobuvttadeami ja maiddái design, lea go daid dárbu suddjet.
