Biebmobearráigeahčču dieđiha ahte guovtti jagi siste ii galgga šat lohpi eret váldit luossadihkiid biebmoluosain lieggačáziin, +28 gráda rájes gitta +34 grádii, go ná liegga čáhci bávččagahttá luosa.
Biebmobearráigeahčču dieđiha neahttasiiddustis ahte guovtte jagi siste ii galgga šat leat lohpi eret váldit luossadihkiid čáziin mii lea lieggasut go + 28 gráda (termála luossadihkiid eretváldin), jus ođđa máhttu ii sáhte duođaštit ahte dan sáhttá geavahit buorebut.
Ođđa iskamat čájehit ahte biebmoluossa čájeha čielgasit iežas láhttenvugiin ahte lieggačáhci, +28 grádas ja lieggasabbo, lea guollái bávččas.
Iskanbohtosat ahte ii leat guoli buresloaktimii dohkálaš eret váldit luossadihkiid nu liegga čáziin.
Lieggačáhci goddá luossadihkiid
Termála luossadihkiid eretváldin vuohki lea luoitilit biebmoluosa lieggačáhcái mii lea +28 gráda dahje lieggasat sullii 30 sekundda.
Dat goddá luossadihkiid mat gahččet eret guolis.
Dát lea eanemusat geavahuvvon vuohki boalddestit eret luossadihkiid biebmoluosain.
Jagi 2018 čađahuvvojedje 1370 lieggačázi dikšuma dahje 68 proseantta dálkkaskeahtes dikšunvugiin.
Duogáš iskamii
Lea dovddus ahte lieggačáhcedikšumis sáhttet biebmoguolit vahágahttojuvvot dahje jápmit.
Maŋimuš jagiid lea Biebmobearráigeahčču ožžon olu diekkár dieđuid.
Dasa lassin leat dutkit ja guolledearvvašvuođabargit jearran lea go dát lieggačáhcedikšun bávččaš guollái.
Biebmobearráigeahčču bivddii danin Mearradutkaninstituhtta (MI) ja Veterinearainstituhtta (VI) (šibitdoavttirinstituhta) jagi 2018 bargun árvvoštallat bávččagahttá go lieggačáhcedikšu guoli.
Lieggačáhci bavččagahttá luosa
Gaskaboddosaš bohtosat iskamiin čájeha ahte biebmoluosat maid luoitá lieggačáhcái, + 28 gráda ja lieggasat, čájehit láhttenvugiin ahte lea bávččas.
Go guolit dovde bákčasa lieggačázis, de vuodjagohte hirbmat johtilit, boŋkaledje lihtteseinniid vuostá ja bárde oivviid.
Čázeoaivvis vuodjagohte birratbirra ja muhtumin botnjasedje nuppi guvlui.
Loahpas massii guolli dássedeattu ja velledii gilgga ala.
Heivemeahttun guollečálgu
MI ja VI geažuhit ahte eanet vahágat ja jápmu lieggačáhcedivššus soaitá leat hušša ja panihkka maid guolli dovdá go šaddá lieggačáhcái.
Iskamiid bohtosat ja eará duođašteapmi maid MI ja VI leat buktán, duođašta ahte ii leat guollečálgui dohkálaš eret váldit dihkiid čáziin mii lea +28 gráda gitta +34 grádii, lieggasut go +34 gráda ii leat lobálaš.
Jus guolli šaddá ná liegga čáhcái, de geahččala guolli báhtarit jođánit ja reakšuvdna soaitá vuolgit luosa bávččasdovddi rávssáin. Biebmobearrágeahčui mielas ii leat dohkálaš elliidčálgu.
Lieggačáhcevuohki ii gildojuvvo vuos
Biebmobearráigeahčču lea čoahkkinastán biebmoguollefitnodagain, reaiddobuvttadeddjiin, ealáhusa servviiin, guolástanbargoveagain ja sin servviin.
Gulahallan ealáhusain joatkašuvvá.
Biebmobearráigeahčču vuordá ahte ealáhusat vuhtii váldet dán iskama bohtosa.
Dan sivas go eará luossadihkiid eretváldinvuogit maid sáhttet hedjonahttit guollečálggu, de ii bisset Biebmobearráigeahčču lieggačáhcevuogi.
– Ealáhus ferte gávdnat eará vuogi
Biebmobearráigeahčču oaivvilda ahte ealáhus ferte geavahit dán guovtti jagi gávdnat buoret čovdosa mii sihkkarastá buoret guollečálggu.
Biebmobearráigeahčču dárkkista maid ahte biebmoguolleásahusain lea siskkáldas dárkkistanvuogádat mat sihkkarastet guollečálggu ovdal go álggahit dihkkeeretváldindikšuma.
