-Almmuhus-
MAGASIIDNAÁigot geahččalit máilmmiolahusa bidjat

Áigot geahččalit máilmmiolahusa bidjat

-

-

Ihttin disdaga áigot Mázes geahččalit olahit máilmmiolahusa ja ráhkadit máilmmi stuorimus niehkodustejeaddji.

– Mázii bohtet guokte indiána guossin, nubbi lea Kanadas eret ja nubbi Lulli-Dakotas, geat áiguba logaldallat, oahpahit duddjot indiánaid dujiid ja maid ráhkadit indiánabiepmuid maid soai áiguba vuovdit olbmuide. Dan oktavuođas mii hástalit buohkaid searvat miellagiddevaš doaluide Mázes, hástala Biret Margit Hætta Sara.

 

Máilmmiolahus

Indiánat, geat boahtiba Mázii, áiguba maid geahččalit ráhkadit máilmmi stuorimus niehkodustejeaddji Mázii mainna maid áiguba geahččalit olahit máilmmiolahusa.

Niehkodustejeaddji galgá šaddat vihtta mehtera alu ja govddu, ja jus dan nagodat ráhkadit, de gal dat lea máilmmi stuorimus niehkodustejeaddji. Indiánat háliideaba maid olbmuid searvvahit ráhkadit niehkodustejeaddji, nu ahte mun gal ávžžuhan buohkaid, geat háliidit searvat, dohppet mielde boares gávnniid maid sáhttá gaikkodit, ja boahtit Máze skuvlla lusa disdaga, dadjá Biret Margit Hætta Sara. 

– Mii bat niehkodustejeaddji lea?

– Niehkodustejeaddji lea indiánaid ráhkkanus mii galgá várjalit olbmuid geat ođđet. Niehkodustejeaddji várjala oađđi olbmuid bahás vuoiŋŋain ja duste fasttes nieguid, muitala Biret Margit.

 Niegadehpet go dii fasttit Mázes go máilmmi stuorimus niehkodustejeaddji áigubehtet ráhkadit Mázii?

– Hehe, ii dan gal, muhto heivii nu ahte indiánat boahtiba Mázii ja áiguba de geahččalit olahit máilmmiolahusa, dadjá Biret Margit.

 

Indiánaid prográmma Mázes

– Indiánat joavdaba Mázii disdaga beaivet, ja gaskal 17:30 – 20:30 mii geahččalit ráhkadit máilmmi stuorimus niehkodustejeaddji. Gaskavahku soai logaldallaba skuvlamánáide beaivet, ja maŋŋelgaskabeaivvi leat lágideamit skuvllas gos soai earret eará ráhkadeaba indiánabiepmuid maid guossoheaba olbmuide. Gaskavahkku gaskal diibmu 17:30 ja 20:30 oahpaheaba soai duddjot indiánadujiid Máze skuvllas, muitala Biret Margit Hætta Sara. 

 

 

-Almmuhus-