Norway Cup lea bargamin olles fárttan oažžut joavkkuid searvat dán jagaš čiekčamii vaikko koronavirus áitá bisseheames doaluid.
– Mii doalahat jáhku, ja plánet ahte lágiduvvo. Leat hállan 500 servviin, ja sii leat movttegat ahte mii geahččalat lágidit. Lea dehálaš ahte lea juoidá masa illuda, dadjá generálačálli Pål Trælvik Norway Cup:s NTB:i.
Beassážiid maŋŋá de álget cupa bargit geahččalit oažžut joavkkuid searvat.
– Mii dieđihat sidjiide ahte ii mávsse maidege jos čiekčangilvu ii lágiduvvo. Dalle mákso gilvovearru ruovttoluotta. Ja jos lágiduvvo, de dahkko daid njoammusuodjalusnjuolggadusaid mielde, dadjá generálačálli.
