Koronaheahtedilis lea Máhttodepartemeanta gaskaboddosaččat rahpan vejolašvuođa maŋidit oahppoloana máksima eanet go golbma jagi.
Dál evttoha departemeanta rievdadit oahpahusdoarjjalága bissovaččat nu ahte Loatnakássa sáhttá maid erenoamáš dilis guhkidit máksingáibádusaid eanet go golbma jagi.
– Lassi maŋideapmi máksimiid dáfus lea álkes vuohki movt geahpidit sin noađi geat rahčet ekonomalaččat. Dat dahká ahte lea okta unnit gollu man birra dárbbašit jurddašit. Ohcamat leat lassánan ohcamušain maŋemus vahkkuid, mat čájehit ahte lea dárbu dasa. Dan dihte rievdadit lága, lohká dutkan- ja alit oahppoministtar Henrik Asheim (Olgeš).
Dábálaččat sáhttet buohkat geat mákset oahppoloana maŋidit máksima juohke mánu, 36 geardde, mii lea golmma jahkái. Gaskaboddosaš koronalágas lea maid Loatnakássa ožžon lobi addit maŋideami maiddái sidjiide geat leat olihan dan 36 mánnosaš ráji. Go koronaláhka lea gaskaboddosaš, de jávká fas máksinmaŋideami vejolašvuohta go koronaláhka ii leat šat doaimmas miessemánus.
– Go rievdadit lága, de máksá dat ahte Loatnakássa sáhttá lasihit máksingáibádusa sidjiide maid geat leat jo maŋidan golmma jagi ovddas, muhto geat ain dárbbašit unnidit goluid mánnosaččat. Láhkarievdan máksá maid ahte mii sáhttit boahtteáiggis addit eanet máksinmaŋidemiid, jus geavvat sullasaš dillái nu go dál leat, lohká Asheim.
Jus Stuoradiggi dohkkeha dán evttohusa, de rievdada departemeanta láhkaásahusa máksima ektui, ja viiddida máksingáibádusaid maŋideami Loatnakássii nu guhká go koronadilli bista.
