Guođoheaddjit ja Sálat suohkan leat bovden ministariid boahtit Nordlándii vai besset ságastallat boraspireváttisvuođaid birra ja movt daid hástalusaid čoavdit.
Guođoheaddjit ja Sálat suohkan leat bovden ministariid boahtit Nordlándii vai besset ságastallat boraspireváttisvuođaid birra ja movt daid hástalusaid čoavdit.
Čihččet regiovnna hálddašanplána lea revideremis ja ođđa plána galgá gárvvistuvvot dán jagi loahpas. Nordlándda fylka lea ovdal ožžon kritihka go hálddašanplána ii leat ollislaš. Sihke ovddit eanandoalloministtar ja ovddit birasministtar leat dadjan ahte guovlojuoguid berre buoridit.
Garra reakšuvnnat
Sávzadoallu Sálágis nuorttabealde E6 luottas ožžo fálaldaga dakkaviđe nuppástuhttit sávzadoalu jagi 2015:s. Sivvan lei go biebmobearráigeahčču lei vuorjašuvvan go geatki lei laskan dehálaš guohtunbáikkiin ja go eai doalahan getkkiidlogu vuollin. Garra reakšuvnnat čuožžiledje sihke eanandoalus ja boazodoalus Sálágis.
Háliidit buoridit ipmárdusa
Nordlándda boraspirelávdegoddi áigu ovttas Sálát suohkaniin bovdet Eanandoallo- ja biebmoministara Jon Georg Dale, ja Dálkkádat- ja birasministara Vidar Helgesen boahtit Sálágii Nordlándii, ja čoahkkinastit eanandoaluin ja boazodoaluin vai šaddá buoret ipmárdus geográfalaš hástalusaide guovlluhálddašeamis ja boraspiresoahpamuša čađaheapmái.
Guođoheaddjit ja Sálága suohkan áigot ovttas čájehit ministariidda daid areálaid girdiin ja ásahit njuolggo ságastallama hástalusaid birra boahtteáiggis. Čoahkkima leat gohččon jođáneamos lági mielde.
