Boasttu ja unnán biebman vuorrasiid gaskkas lea stuora váttisvuohta buhcciidruovttuin ja ruovttubálvalusain.
Ráđđehus dieđiha iežaset neahttasiiddus ahte biebmodábit vuorrásiid gaskkas galget buorránit ođđa strategiijaplánain.
Strategiijas gehččet golbma vuoruhansuorggi; systemáhtalaš biebmobargu, doarvái ja rievttes gelbbolašvuohta, ja biebmo- ja biebmančuovvoleapmi mii lea heivehuvvon juohkehačča dárbbuide ja sávaldagaide.
Norggas leat unnán dutkamat vuorrasiid biebmodábiid birra, ja dan dihte áigu ráđđehus bivdit Dearvvašvuođadirektoráhta kártet makkár biebmofálaldagat vuorrasiin leat ja movt buhcciidruovttut ja ruovttubálvalusat čuvvot vuorrasiid biebmandili.
– Ođđa máhtuin beassat mii mearrediđolaš doaibmabijuiguin álgit. Go vuorrasat guirot, de hedjona dearvvašvuohta ja eallinárvu, mii dagaha ahte vuorrasat dárbbašit vel eambbo veahki dearvvašvuođa- ja fuolahusbálvalusas, lohká Høie.
