6-7 bohcco leat šaddan stuora giksin Sommarøy ja Hillesøy álbmogii go guhtot priváhta gilvvamuoraid. Dál áigu Fylkkamánni báhčit daid.
6-7 bohcco leat šaddan stuora giksin Sommarøy ja Hillesøy álbmogii go guhtot priváhta gilvvamuoraid. Dál áigu Fylkkamánni báhčit daid.
Tromssa fylkkamánni boazodoallofága ovddasvástideaddji Øystein Ballari lohká sin vuordime nammarievtti mearrádusa vai besset báhčit dan 5-6 varis bohcco ja ovtta njiŋŋelasa mat leat boahtán Sálliris šaldi badjel Sommarøyai ja Hillesøyai.
– Dakkaviđe go doppe addet dan lobi, de čohkkestit mii bivdojoavkku mii galgá báhčit daid bohccuid guoskevaš njuolggadusaid mielde, dadjá Ballari.
Galge njuovvat
Ballari lohká sin ožžon dieđu juovllaid áigge juo ahte doppe guhtot bohccot dáin sulluin, gos ii galgga leat boazodoallu. Sii leat dalle dieđihan boazoeaiggádiidda dan birra, ja sii leat leamaš guovllus ja doallan oktavuođa boazoeaiggádiiguin. Ballari lohká dan nuppi boazoeaiggáda Sálliris addán sidjiide fápmudusa lágidit ja čađahit bohccuid heakkahuhttima. Dan fápmudusa dat ferte ge diggegoddi dohkkehit ovdal go Fylkkamánni beassá jávkadit bohccuid.
Ballari lohká maid boazoeaiggádiid čilgen ahte ii leat heiven njuovvat daid bohccuid nugo ledje áigon.
– Dat bohccot leat juo hárjánan mannat šaldi mielde nuppi sullui. Okta čoavddus livččii gal doalvut daid davágeahčái Sállira, muhto de ges mannet bohccot Romssa sullui, ja dat ii geat leat danne buorre čoavddus, dadjá Ballari.
Gilvvagárddit geasuhit
Nordlys aviisa dat čálii dán ášši birra, ja báikkálaš olbmot Sommarøyas váidalit ahte sidjiide leat dát bohccot stuora giksin, go guhtot sin gilvvamuorain urbbiid.
Boazoeaiggát Per Kitti duođašta ahte sis leat muhtin bohccot mat vigget dáidda smávva sulluide oarjjabealde Sállira.
– Bohccot leat dán dálvvis juo guktii rasttildan šalddi Sommarøyai, ja leat hárjánan dohko mannat. Mun oaivvildan ahte eiseválddit berrešedje baicca ráhkadit juogalágán hehttehusaid šaldegeahčái, vaikko rindevuođu, vai bohccot eai beasa daidda sulluide, dadjá son Ávvirii oanehaččat.
Guhká bargan
Ballari ii loga boazoeaiggádiid goit sidjiide ovddidan makkárge vuostálastima bohccuid jávkadeami oktavuođas, nugo Nordlys čállá iežaset artihkkalis. Son čilge Ávvirii ahte šaldiide ledje álggos bidjan rindevuođuid mat cagget elliid rasttildeames, muhto daid badjel leat maŋŋel lebben pláhtaid muohtaboltuma geažil.
– Mii áigut váldit dien beali fas ovdan, go mii háliidit oažžut bistevaš čovdosa dán váttisvuhtii. Dát ášši lea leamaš hástalussan juo máŋga jagi, sihke eiseválddiide, ealáhussii ja báikkálaš olbmuide. Ja mii maid háliidit ahte Sálliris galggašii leat boazodoallu boahtteáiggis, go lea buorre orohat.
Jáhkká vuolgit
Ballari jáhkká gal ahte jus diggegoddi ádjána áššiin, de dáidet bohccot ieža mannat fas Sállirii varas guohtumiidda go dál bievlá doppe maid albmaládje.
