Áigot ásahit sierra guollejávreláhtuid

Kárášjoga gieldda plánalávdegotti jođiheaddji Kjell Magne Grønnli (Bargiidbellodat) oaidná dál dárbbu go Ávvir lea čállán sierralobiáššiid ovdanbuktit álbmogii ahte sii leat bargame ja geahčadeame njuolggadusaid mat gusket sierralobivuodjimii.

– Sierralobilávdegoddi gullá plánalávdegotti vuollái ja mii leat čállime dál evttohusa mas áigut rievdadit láhtuid. Mii áigut geahčadit vejolašvuođaid rievdadit láhtuid nu ahte mannet njuolga buriid guollejávrriide.

Ođđa láhtut boahtte dálvái

Grønnli čilge sii jurddašit nu movt Trøndelágas leat dahkan, njulgestaga guollejávreláhtuid ásahit.

– Das ferte geahčadit gokko heive rabas láhttu, gosa gálgá sierralohpi ja gokko ii heive láhttu. Evttohus galgá de dieđusge álggos gulaskuddamii dán giđa mielde masa gieldda hálddahus, báikkálaš searvvit, geavaheaddjit ja orohagat besset buktit cealkámušaid dan ektui. Jáhkkimis bohtet de buorit cealkámušat evttohussii ja boahtte dálvvi rájes de leat sávvamis válbmasat sihke ođđa njuolggadusat ja ođđa láhtut, lohká son.

Bievlavuodjima maid geahčadit

Grønnli lohká maid sin áigut bievlavuodjima geahčadit.

– Mii fertet dieđusge kártet dálá láhtuid, ja geahččat dain dárbbuid maid. Dan dieđusge eat sáhte dahkat ovdal go bievlá ja jáhkkimis leat dat gergosat maŋit jagi.

Boahtte vahkus meannudit

Dat mii guoská váidagii go nuppelohkái olbmo eai ožžon sierralohpi, ja fas sierralobilávdegotti lahttu guhte oaččui sierralobi, lohká Grønnli ná:

– Gielddas lea buot lávdegottiin bealálašvuođa njuolggadus, ja ferte geahččat lea go sierralobilávdegoddi muitán daid njuolggadusaid áššemeannudeamis. Boahtte vahkus lea lávdegottis čoahkkin gos meannudit váidaga, ja jus dat doalahit mearrádusa, de manná váidda viidáseappot Fylkkamánnái.