Eanandoallo- ja biebmoministtar lea dál ovdanbuktán stuorradiggedieđáhusa boazodoalu birra, mas boahtá earret eará ovdan ahte boazologut galget almmuhuvvot ja buot bohccuid galget klipsehit.
Eanandoallo- ja biebmoministtar lea dál ovdanbuktán stuorradiggedieđáhusa boazodoalu birra, mas boahtá earret eará ovdan ahte boazologut galget almmuhuvvot ja buot bohccuid galget klipsehit.
– Go boazoeaiggádat dihtet nuppiid boazologu, de dat sáhttá váikkuhit dasa ahte boazoeaiggádat šaddet duostileabbon vuovdit eanet, dadjá Dale.
– Dat fas mielddisbuktá ahte bohccobiergu mas lea alla kvalitehta gávdno jámmat biergomárkanis, ja boazolohku maid heivehuvvo guohtumiidda, joatká eanandoallo- ja biebmoministtar preassadieđáhusas.
Duoddaris borranbeavdái
Buresdoaibmi bohccobiergomárkan lea áibbas guovddážis dasa ahte olahit boazodoallopolitihkalaš mihttomeriid.
Bohccobiergobuktagiid kvalitehta lea buorránan. Ođđa klassifiserenvuogádat bálkkaša buriid biergobuktagiid, čállá ráđđehus.
Ráđđehus háliida čatnat muhtun boazodoallošiehtadusa guoskevaš doarjjaortnegiid njuolga dan ođđa vuogádahkii.
– Mii eaktudit ahte boazodoallu lea ođđaáigásaš ja gilvonávccalaš ealáhus mii buvttada bierggu márkanii mii jearaha ja háliida dearvvašlaš ja dorvvolaš biepmu, cealká eanandoallo- ja biebmoministtar Jon Georg Dale.
Dáppe sáhtát lohkat olles Stuoradiggedieđahusa boazodoalu birra
Bákkolaš indiviidamerken
Nannen dihte boazodoalu sajádaga áigu ráđđehus áiggi mielde ásahit bákkolaš indiviidamerkenvuogádaga.
Dát merkenvuohki boahtá lassin árbevirolaš bealljemerkenvuogádahkii.
– Indiviidamerken mielddisbuktá ahte boazoeaiggádat ožžot johtileappot ja sihkkaris mávssu boazonjuovahagain daid bohccuid ovddas maid vuvdet, dadjá Dale.
– Dan lassin addá indiviidamerken vejolašvuođa buorebut dárkkistit boazologu. Boazolohku lea deháleamos rámmaeaktu juohke boazoeaiggádii, deattuha Jon Georg Dale.
Siskkáldas iešstivren
– Siskkáldas iešstivren, man boazoealáhus oaččui 2007 boazodoallolágas, galgá joatkašuvvat ja nannejuvvot, cealká Dale.
– Rievdadusárvalusat mat dál ovddiduvvojit galget oppalohkái ovddidit boazodoalu ekologalaš ceavzilis guvlui mii sihkkarastá bissovaš ekonomalaš rámmaid ja addá vuođu jođihit bearašboazodoalu, dadjá eanandoallo- ja biebmoministtar Jon Georg Dale.
Erenoamáš vásáhusat
Boazodoallu sáhttá fállat erenoamáš ja árbevirolaš bálvalusaid main mátkeealáhus ja heivehuvvon oahppan- ja fuolahusvuđot bálvalusat leat guovddážis.
Boazodoallobearraša buvttadanárvvut lassin biergobuvttadeapmái, leat mearrideaddjin bearraša dienasvuđđui, oaivvilda ráđđehus.
– Eai leat nu ollu ealáhusat mat sáhttet nu go boazoealáhus fállat mátkeealáhusbálvalusaid ja bálvalusaid mat gusket fuolahussii ja oahppamii, ja eará doaimmaid maid servodat ohcala, dadjá eanandoallo- ja biebmoministtar Jon Georg Dale.
Ráđđádallamat
Ráđđádallanšiehtadusa vuođul leat čađahuvvon ráđđádallamat Sámedikkiin ja Norgga Boazosápmelaččaid Riikkaservviin (NBR) dieđáhusa doaibmabijuid árvalusaid birra.
Ráđđádallamiid bokte leat boazodoallopolitihka dárkilit guorahallan, čállá ráđđehus preassadieđáhusastis.
Árat odne goittot ge logai NBR jođiheaddji, Ellinor Marita Jåma Ávvirii ahte sii eai beassan oaidnit olles dieđáhusa ovdal go stáhta loahpahii konsulteremiid singuin.
– Danne maiddái eat sáhttán doarjut dieđáhusa, logai Jåma.
Stuorradiggi galgá loahpalaččat meannudit stuorradiggedieđáhusa, dál dattege ii leat vuos mearriduvvon goas dán meannudit.
