Sámediggeráđđi áigu addit čielga dieđu Stuoradiggái.
Sámediggeráđđi cealká ahte leat vuostá hukset bieggaindustriija boazodoalloorohagaide.
– Bieggafápmohuksen fárrolaga eará infrastrukturhuksemiin ja maiddái stáhta boraspirepolitihkka, leat stuorra noađđin guoskevaš boazodollui, oaivvilda sámediggeráđđi Silje Karine Muotka (NSR).
Sámedikki oaidnu
Boahtte vahkku galgá Sámedikki dievasčoahkkin meannudit ášši Sámedikki oainnu birra bieggaindustriijai mii lea nannámis. Muotka muitala ahte sii áigot addit čielga dieđu Stuoradiggái ahte boazoguohtunareálaid ain gáržžideapmi ii sáhte dohkkehuvvot, ja danne ovddidit cealkámuševttohusa Stuorradiggái go meannuda bieggaindustriijaášši.
– Dán cealkámuša sáddet mii buot stuorradiggejoavkkuide, dadjá Muotka.
Bisuhit dili
Čalmmustuvvon lea stuorradiggedieđáhusevttohus konsešuvdnavuogádagaid birra bieggaindustriija várás. Evttohusas leat konsešuvdnaproseassat veaháš rievdaduvvon, muhto sámediggeráđi oaivila mielde bisuhit dili almmá guđege lágan einnostahttivuođa das, gosa sáhttá ohcat ja hukset bieggaindustriija.
– Sámi kulturbargui ja sámi ealáhusaide čuohcá hui negatiivvalaččat, ja dat guoská erenoamážit sámi boazodollui, dadjá sámediggeráđđi Silje Karine Muotka (NSR), ja čujuha preassadieđáhusas negatiivvalaš vásihusaide Øyfjell-áššis. Das oidnet dán ovdamearkan man funet sáhttá mannat bieggaindustriijaáššiin ja proseassain go OED lea diktán huksejeaddji huksegoahtit vaikko konsešuvdnaeavttut bohccuid johtolaga goziheamis guovllus eai leat gozihuvvon.
– Eanaš boazoguohtonguovlluin ii leat sadji bieggafápmohuksemii, dadjá Muotka, preassadieđahusa dieđuid mielde, ja čujuha fylkkamánni raportii: Nasjonal ramme for vindkraft på land. Reindriftsvurderinger av analyseområder som berører samisk reindrift», mii ráhkaduvvui bieggafámu nationála rámma oktavuođas nannámis, ja mas váldoáššis konkluderejuvvo justa nu.