Olusat leat hui šluđut dárkkistit ja áimmahuššat buollinsihkkarvuođarusttegiid ruovttus. Ná dárkkistat man guhká du suovvanjurggonas ja dollačáskadanapparáhta bistá.
– Eatnašat eai dieđe ahte suovvanjurgganasain, dollačáskadanrusttegiin ja dollačahcerevrriin lea beaivemearri man guhká bistet ja daid ferte dávjá dárkkistit. Beaivválaš hušas gal várra ii muitte dárkkistit, iige áimmahuššat buollinsihkkarvuođarusttegiid, lohká Jan Olav Nilsen gii lea vaháteastadanovddasvástideaddji If-dáhkádusfitnodagas Norsk Brannvernforeningii.
Dollačáskadanapparáhta galget fágaolbmot dárkkistit juohke viđát jagi ja das galgá leat olles service juohke logát jagi. Geahča dan bohttala vuolde. Dattetge dat ii dahkko ja olbmot ostet ođđa dan sadjái go áimmahuššat dan, go eai muitte goas oste dan. Apparáhta dehálamos bargu lea veahkehit du báhtarit olggos. Danin galgá unnimusat okta dakkár apparáhtta leat juohke dálus. Buoremus jus lea juohke gearddis.
– Oktii jagis šluvge apparáhta vulos bajás eastadit pulvara geađgiluvvamis. Dárkkis ahte njuolla čájeha ahte lea ruoná ja ahte lea teahtta, rávve Oslo buollin- ja gádjunossodaga buollinoahpaheaddji Audun Olsen-Skaldehaug.
Suovvanjurggonasaid ferte juohke logát jagi molsut, eai dat bistte agálaččat. Das oaidná duogábealde man boaris lea. Lága mielde galgá leat suovvanjurgganas juohke gearddis ja galgá maiddái gavjjaid dain sihkastit eret duollet dálle.
Smávva dollačáskadanbohtalat leat vuohkkasat čáskadit dola ovdamearkka dihte kievkkanis. Go leat vihtta jagi vássán, de ferte molsut dan ođđasat apparáhtain.
Jan Olav Nilssen muittuha ahte čáhcebohcci mii lea dollačáskadeami várás, ferte maid dárkkistit ahte lea čavddis ja ain doaibmá. Fitnodagaid čáhcebohcciid galgá jahkásaččat fágaolmmoš dárkkistit.
Gáldu: brannvernforeningen.no
