-Almmuhus-
OĐĐASAT– Áigi addit saji earáide

– Áigi addit saji earáide

-

-

Sámeráđi presideanta Áile Javo (38) lea mearri­dan guođđit politihka, maŋŋel go ođđa Sámeráđđi vuođđu­duvvo boahtte lávvardaga 21. Sámekonferánssas Troandimis.

Áile Javo lea hárjánan politihkkár ja leage čohkkán Sámeráđis maŋimuš 19 jagi ja guokte maŋimuš áigodaga čohkkán presideantan.

Javo lea muđui politihkken badjel beali eallimis, go lei dušše 18 jahkásaš go searvvai Sámedikkepolitihkkii. Dál goittot oaidná son, ahte lea áigi addit saji earáide.

 

Joatká bargin
Lea 21 háve go Sámekonferánsa lágiduvvo ja dán háve lágiduvvo Troandimis 100 jagi ávvudeami oktavuođas. Dasa lassin lágida Sámeráđđi fáddáeahkeda «Oktasaš Sápmi» vuosttaš beaivvi.

Sámekonferánsa vuođđuduvvo duorastaga guovvamánu 9.beaivvi, almmolaš rahpan lea bearjadaga ja lávvardaga vuođđuduvvo ođđa 15 lahttu Sámeráđđi, mii fas vállje ođđa presideantta ja ođđa ­bargolávdegotti.

 

Dán háve ii goittot leat šat Áile Javo mielde válljemis lávvardaga, gii lea čohkkán Sámeráđis jagi 1998 rájes.

– Mun in guođe Sámeráđi, muhto joatkán bargin maŋŋá ja lean ain mielde. Muhto politihkkárin mun gal heaittán dál, dadjá son.

 

Vásihan ollu
Áile Javo dovdá ahte lea beassan guhká leat mielde, vásihan ja oahppan hui ollu, muhto lohká ahte lea dál áigi luohpat politihkas.

– Mun dovddan ahte lean beassan leat mielde váikkuheamen ja lean beassan ollu bargat. Leamaš hui somás áigi, erenomážit maŋimuš njealje jagi, go lean leamaš presideantan, dovddasta son.
 

Son dovddasta goittot maiddái lossa áiggiid vásihan, earet eará organisašuvnna ruhtadili geažil, mii ii álo leamaš nu buorre.

– Dat sáhttá máŋgii leat ­hástalus ja šaddat maiddái ollu eakto­dáhtolaččat bargat eahkedii. Mii eat leat nu máŋggas geat bargat, muhto lihkká leat doaimmahan hui ollu, čilge Javo.

 

Áigi molsut
Sámeráđi árbevearru leamaš ­guhká molsut presideantta ­riikkaid gaskka, áigodagaid ­maŋŋil, muhto dan njuolggadusa leat sihkastan eret muhtin jagi áigi.

– Dat galggašii molsašuvvat, nu ahte ii dušše ovtta olbmo ­duohken. Dat lea ovttasbargoorgána ja lea ovttasbargovuoigŋa mii lea guovddá­žis, deattuha Javo.

 

Áile Javo ii dieđe evttohasaid presideantta virgái, iige loga iežas háliidit dasa seaguhit.

– Šaddá gelddolaš oaidnit maid ođđa Sámeráđđi mearrida, ­muhto livčče várra áigi ahte presideanta boahtá dál nuppe bealde rájá, ­lohká son.

 

-Almmuhus-