-Almmuhus-
GUOIMMUHEAPMI– Áiggun luomus gáhtat go vástidin dán telefovnna!

– Áiggun luomus gáhtat go vástidin dán telefovnna!

-

-

Namma: Johan Ante Utsi

Ahki: Doarvái boaris

Guovlu: Guovdageaidnu

1. Kathrine Nedrejord čálii girjji «Forvandlinga». Makkár bálkkašumi son vuittii dainna?

– Mun in dien dieđe. Ferten vástidit 

Litteraturprisen. Boastut!

Rivttes vástádus: Havmannbálkkašumi.

 

2. Maid bargá áldu go ohkoladdá?

– Áldu ohcá iežas miesi! Riekta!

 

3. Mii lea Hinnøya sámegillii? 

– Lea go dieppe Hámmárfeasta guovllus? Gal 

mus ii jora oaivi dál nu bures. Ferten lohkat, in dieđe. Boastut!

Rivttes vástádus: Iinnasuolu

 

Johan Ante ii vástidan buot golbma gažaldaga riekta, ja de ii beassan liigegažaldagaid vástidit. Son beassá liikká válljet árvádusaid maiguin sáhttá fasket 5,10, dahje 15 čuoggá. Dat lea dan duohken makkár ivnni vállje. Jus vástida riekta de oažžu: Rukses árvádus lea váddáseamos ja das oažžu 15 čuoggá, alit árvádusas 10 čuoggá, ja ruonás fas 5 čuoggá.

 

Johan Ánte válljii alit ivnni, mii lea nubbin váddá­seamos árváduskategoriijas, ja oažžu dákkár árvádusa:

 

Mii manná bajás muhto ii goasse mana vulos šat?

– Huff mus ii jora oaivi dál ii veahášge. Mii son dat lea? Beaivi? Ii, dat gal manná vulos. Mun in dieđe. Boastut! 

Rivttes vástádus:Ahkki!

 

Galle čuoggá oktiibuot: 1

 

– Áiggon luomus dál gáhtat go vástidin dán telefuvnna, lohká Utsi ja reašká.

Utsi lea lumostallame dál. Son lohká leamašan Álttájogas bivdime guoli, ja áigu ain bivdit oaggungilvvus Olmmáivákkis dán vahkkoloahpa. Muđui ii leat luomu nu plánen moktege.

 – Mun in liiko luomu nu plánet. Mun vuolggán dohko gosa háliidan, fáhkka. Lean jurddašan gal lulli-Norggas finadit, muhto in dieđe vuos.

 

Juohke gilvaleaddji beassá hástalit ođđa gilvaleaddji Ávvira geassegilvui ja Johan Ante Utsi hástala Nils Johan N. Eira, Guovdageainnus.

– Son lea hui jurddašeaddji olmmái. Lohká olu girjjiid ja máhttá hui olu. Jáhkán son vuoitá dán gilvvu!

ÁVVIRA GEASSEGILVU

 

Dán gilvvus lea mihttu čoaggit čuoggáid. 

 

Álgovuorus leat 3 gažaldaga, jus daid vástida riekta de manná viidáseappot. Juohke rievttes vástádusas oažžu 1 čuoggá. Jurddašanáigi: 20 sekundda.

 

De álget liigegažaldagat maid galgá vástidit 10 sekunddas. Liigegažaldagain oažžu 1 čuoggá. Gilvaleaddji manná viidáseappot nu guhká go vástida riekta liigegažaldagaid. 

 

Jus ii vástit áigemearrái, de manaha čuoggá.

 

Juohke gilvaleaddji beassá vel geahččalit vástidit ovtta árvádusa mainna sáhttá oažžut 5, 10 dahje 15 čuoggá, dan mielde makkár ivnni vállje; rukses, alit dahje ruoná. Rukses árvádus lea váddáseamos ja jus dan máhttá, de oažžu 15 čuoggá. Alit árvádusain oažžu 10 čuoggá ja ruoná árvádusain 5 čuoggá. Árvádusaid smiehttanáigi lea 1 minuhta.

 

Buohkat geat leat mielde Ávvira geassegilvvus ožžot Flax-vuorbbi. Dat gii nagoda čohkket eanemus čuoggáid vuoitá iPad-mini.

 

Juohke gilvaleaddji beassá hástalit ođđa gilvaleaddji Ávvira geassegilvui.

 

Ávvira bargit ja sin bearrašat eai sáhte searvat gilvui. 

 

 

-Almmuhus-