Vaikko Sámedikki dievasčoahkkin bálkestii Aili Keskitalo eret presideantastuolus, de lohká son liikká áigut geahččat ovddasguvlui.
Vaikko Sámedikki dievasčoahkkin bálkestii Aili Keskitalo eret presideantastuolus, de lohká son liikká áigut geahččat ovddasguvlui.
– Dat bálkestedje mu njulgestaga eret presideantastuolus ja dat ii leat somá, iige lean dat maid ledjen háliidan, inge lean dan plánen, dovddasta Keskitalo Ávvirii dakka maŋŋel jienasteami.
Badjelaš diibmu golmmas jotke bušeahtta ášši meannudeami ja maŋŋil go Bargiidbellodaga, Olgeža ja Árjja bušeahttaárvalus dohkkehuvvui measta ovttajienalaččat, de ovddidii Vibeke Larsen eahpeluohttámuša dálá sámediggeráđđái.
Eanetlogus ii lean luohttámuš
Eanetlohku doarjjui sin ja Aili Keskitalo ii leat šat sámediggepresideanta ja Silje Karine Muotka, Ann Mari Thomassen, Henrik Olsen ja Thomas Åhren leat guođđán ráđi.
Ihttin diibmu 09:00 galgá dievasčoahkkin válljet ođđa ráđi ja maiddái presideantta.
Videos oainnát Aili Keskitalo go luobai, ášši joatká dán vuolábealde:
Iežas sátnevuorus logai Aili Keskitalo leamašan gudnin jođihit Sámedikki maŋimuš golbma jagi ja giittii buot vehkiid. Dasto luobai son presideanttavirggistis.
Bidjá návccaid válggaide
Keskitalo lohká iežas áigut goittot geahččat ovddasguvlui ja álgit ráhkkanit ođđa válggaide, mat leat vuollel jagi geahčen.
– Mun háliidan bidjat buot návccaid dasa mii boahtá válgagižžui ja oažžut vejolašvuođa ođđa luohttevašvuhtii jienasteddjiin, dadjá son.
Vaikko maŋimuš vahkku lea gáibidan ollu návccaid ollu politihkkariin, de lohká Keskitalo dákkár vahkuid leat doarvái politihkas ja lohká dasa hárjánan.
Ávvir jearrá áigugo NSR bargagoahttit fas nannet luohttevašvuođa Sámedikkis siskkáldasat, maŋŋel go dál leat ožžon eahpeluohttámuša ja biddjon eret. Maiddái ahte leago ráđđi váldán oahppu das mii aiddo lea geavvan.
– Diehttelas áigut mii dainna bargat ja organisašuvnnat ohppet álot áiggi čađat. Lean geahččalan hui dárkilit čuovvut mielde ja guldalit dáid moaitámušaid mat leat boahtán, čilge son.
Fápmospeallu
Ávvir jearrá maid Keskitalo áigu bargat eará láhkai válggaid guvlui.
– Dál bijan návccaid válgabargguide, go lea dehálaš ja gáibideaddji barggut. Fápmospeallu lea álot politihkas ja olmmoš ferte dan gierdat ja dohkkehit, dadjá son.
Keskitalo ii loga alddes heajos oamedovddu, vaikko lea dál biddjon eret presideantastuolus.
Vibeke Larsen oaivvildii ahte NSR ii nagot jođihit loahpaáigodaga bušeahttaevttohusain masa Bargiidbellodat oaččui eanetlogu ja man NSR ieš maiddái doarjjui.
– Mun lean dál jearran dievasčoahkkimis, ahte leago sis luohttámuš ráđđái bargat bušeahttaevttohusain, mii ii leat sin iežas, dajai Larsen maŋŋel go ledje vuoitán iežaset bušeahttaevttohusain.
