-Almmuhus-
-Almmuhus-
-Almmuhus-
OĐĐASAT– Áiggun geahččalit váikkuhit

– Áiggun geahččalit váikkuhit

-

-

Sápmelaš fylkkadiggeáirras vuolgá fylkkadiggái maŋit vahkku dainna ulbmiliin ahte váikkuhit vai fylkkadiggi juolluda doarjaga dáiddaskuvlii Kárášjogas, ja nu gádju dán skuvlajagi.

Finnmárkku fylkkadiggi čoahkkana dás guovtti vahkku geahčen juovlamánu 10. beaivvi, de galget mearridit addet go doarjaga Kárášjoga dáiddaskuvlii. Bargiidbellodaga fylkkadikkeáirras, Guovdageaidnulaš Inga Berit A. Sara lohká iežas áigut doarjut dáiddaskuvlla.

– Mun iežan bealis goit ráhkkanan váikkuhit ahte fylkkadiggi galgá juolludit dan 250.000 ruvnna maid dáiddaskuvla lea ohcan, lohká Sara.

 

Ii stuora ruđas sáhka

Sara mielas lea dáiddaskuvla hui dehálaš olles sápmái, go su dieđu mielde lea dat áidna dáiddaskuvla olles sámis.

– Dat lea dehálaš oahppu, iige leat stuora ruđa birra sáhka. Galggašeimmet doarjut go eai leat galle sámi doaimma mat ruhtaduvvojit fylkkasuohkana badjel. Ammal juo sivdnádusas nagodit doarjut, vai eai dárbbaš heaitit ja juobe dán skuvlajagi ge besset čađahit, lohká son.

 

Áigu doarjut

Maiddái Gurut bellodaga fylkkadiggeáirras Klemet Klemetsen lohká dehálažžan doarjut dáiddaskuvlla.

– Mun oaivvildan ahte buot sámi ásahusat leat dehálaččat sámi eallimii ja servvodahkii. Vaikko in dovdda dán dáiddaskuvlla ášši nu bures, de ii leat munnje váttis doarjut skuvlla, lohká Klemetsen.

 

Boastut einnostan

Kárášjoga dáiddaskuvla Stivrajođiheaddji Ingunn Utsi muitala skuvla dárbbaša 777 126 ruvnno čađahit dán skuvlajagi. Son čilge sii ožžot doarjaga Oahpahusdirektoráhtas 11 110 ruvnno juohke oahppi nammii mánus, mii šaddá 66 660 dan guđa oahppi ovddas. 

Oahpahusdirektoráhtta geavaha proseanttarehkenastima mas guhtta oahppi rehkenastojuvvojit 5,91 oahppin ja 13 oahppi ges 12,8.

– Mii ohcat doarjaga cuoŋománus, ja de einnostit galle oahppi álget čuovvovaš skuvlajagi, ja golggotmánus fas lohket galle oahppi leat álgán. Dán čavčča leimmet einnostan 13 oahppi, muhto dušše guđas álge. Vuosttaš jahkebeallái leimmet ožžon 324 024 ruvnno dan 13 oahppi ovddas, ja go eai álgán buot oahppit de fertet máksit ruovttoluotta 164 097 ruvnno. Nuppi jahkebeali leat ohcan 382 886 ruvnno, mii lea maid 13 oahppi ovddas, ja dan eat boađe oažžut, ja nu šaddá veadjemeahttun čađahit dán skuvlajagi, muitala Utsi.

 

Danne Kárášjoga Dáiddaskuvla leage ohcan dál sihke Sámedikkis, Kárášjoga gielddas ja Finnmárkku fylkkagielddas guđesge 250.000 ruvnno doarjaga, oktiibuot 750 000 ruvnno vai sáhttet čađahit dán skuvlajagi.

 

 

 

 

 

-Almmuhus-