Dáloniid listtu lea pláneme doallat álbmotčoahkkima borgemánu 20.beaivvi gos lea jearaldat galgá go Guovdageaidnu sáddet oamastangáibádusa Finnmárkkukommišuvdnii, ja dainna lágiin beassat eret FeFos.
Dáloniid listtu lea pláneme doallat álbmotčoahkkima borgemánu 20.beaivvi gos lea jearaldat galgá go Guovdageaidnu sáddet oamastangáibádusa Finnmárkkukommišuvdnii, ja dainna lágiin beassat eret FeFos.
Dáloniid listtu ovddasteaddji, Isak Mathis O. Hætta lohka ahte ulbmil dainna čoahkkimin lea ahte galgá šaddat báikkálaš stivrejupmi Guovdageainnus.
— Ulbmil lea ahte galgá šaddat báikkálaš stivrejupmi riggodaga ektui. Álbmot ferte ieš beassat mearridit mainnalágiin háliidit hálddašit luonddu ja makkár doaimmat galget suohkanis, muitala son.
Stuora erohus
Jus šaddá báikkálaš stivrejupmi de doaivu Hætta ahte šaddet stuora erohusat, ja ahte suohkana ja báikkálaččaid oaidnu boahtá eambbo ovdán.
— Erohus šaddá dieđusge ahte šaddá buoret oktavuohta báikkálaččaid ja hálddahusa gaskkas. Hattit maid šaddet njidjet omd. bivddu ektui, bivdinlobit rivdet báikkálaš olbmuide, šaddá buoret hálddašeapmi, ja olbmuide šaddá maid álkit boahtit čoahkkimiidda go lea suohkanis ja dainna lágiin de šaddá lagas oktavuohta stivrejupmái, lohka Hætta ja joatká:
— Dat lea dávjá leamaš nu ahte FeFo jurddahan málle ii leat seamma go báikkálaš olbmuid jurddahan málle ealgabivddu ektui, omd. go FeFo mearridii makkár ealggaid galgá bivdit de ii lean suohkanis seamma oaidnu. Muhto FeFo válddi ja bahkkii iežat oainnu ovdán. Die lea konkrehta ášši, mii čielgasit muitala ahte FeFo ii guldal báikkálaš álbmoga ja suohkana. Ja dan maid go báikkálaš olbmot galget muoraid čuollat, de fertejit máksit vearu FeFo:ii, čilge Hætta.
Dehálaš čalmmustahttit
Dáloniid listtu ovddasteaddji Isak Mathis O. Hætta doaivu ahte šaddá váttis olahit dán mihttu, muhto su mielas lea dehálaš čalmmustahttet dakkár áššiid vuoi dillii rievdá.
— Šaddá hui sihkkarit váttis, muhto jus ii goasse váldde bajás dakkár áššiid de eai goasse njuolgga. FeFo maid ferte oaidnit ahte go sii eai gula maid suohkan ja báikkálaččat meinejit de sii eai dohkket dan. Guovdageaidnu lea ovdal leamaš friddjasuohkan 1990 logus, dalle suohkan hálddašii luonddu ieš, ja dat manai bures. Olbmuin lei hui buorre beroštupmi luonddu ektui ja de maid sisabođii suohkanii ruhttá go ieš hálddašii iežat riggodaga.
Álbmotčoahkkin dollojuvvo borgemánu 20. beaivvi ja dohko leat maid bovdejuvvon «Fjellstyresambandet» jođiheaddji ja FeFo stivrajođiheaddji.
