-Almmuhus-
-Almmuhus-
-Almmuhus-
OĐĐASATÁiggošii logi ođđa duottar- ja riddo­stobu 

Áiggošii logi ođđa duottar- ja riddo­stobu 

-

-

Torill Bakken Kåven dieđihii Sámediggái ođđa áššin ásahit ođđa duottar- ja riddostobuid Romsii ja Finnmárkui sihke turismma ja maid bargosajiid geažil. 

– Sámediggi áigu bargat oažžut eambbo bissovaš bargobáikkiid ávdinguovlluide. Mii diehtit ahte turisma rievdá dan guvlui ahte smávit joavkkut beasašedje vásihit eanet luonddulagasvuođa. Lullelis riikkas gávdnojit ollu duottarstobut mat fállet ijastallama ja guossoheami meahccevánddardeddjiide, čállá Bakken Kåven evttohusas.

Evttohusas čállá ahte Sámediggi galgá bargat dan ovdii ahte duottarstohpo-fierpmádat buorrána maiddái davvin. Dainna lágiin lea Sámediggi veahkkin ásaheame buoret fálaldagaid vásáhusaide luonddus. Seammás go mátkeealáhus nannejuvvo, šaddet maid bissovaš bargosajiid ja Romssa ja Finnmárkku guovllut šaddet eanet geasuheaddjin vánddardeddjiide.

Ovttasbargu

FeFo ja Statsskog namuhuvvojit lunddolaš ovttasbargoguoibmin prošeavttas, ja evttoha Sámediggi bidjá mihttun bovdet prošektii ovttas Romssa ja Finnmárkku fylkkasuohkaniin ja hukset logi ođđa riddo- ja duottarstobu almmolaš ruđaiguin.

– Duottarstobuid sáhttá doaimmahit mearreáiggeprinsihpa mielde nu ahte nuorra rávesolbmot besset láigohit ja doaimmahit duottarstobuid šiehtaduvvon áiggiin, mas šiehtadus sáhttá guhkiduvvot. Dat bijašii fokusa luondduvuđot turismii davvin. Lea buorre fálaldat sidjiide geain eai leat iežaset barttat, sidjiide geat háliidit johtit barttaid mielde. Mihttun ferte leat duottarstohpo- fierpmádat mii dahká vejolažžan vánddardit davvin, ja main lea vuogas vázzingaska, čállá son.

Bakken Kåven čilge viidáseappot ahte dakkár doaibmabijut addet eambbosiidda vejolašvuođa vánddardit duoddaris, seammás go almmolašvuohta veahkeha divrras sisaoastimiidda, mat dávjá leat noađđin go háliida doaimmahit smávit, luondduvuđot idjadanbáikkiid.

-Almmuhus-