-Almmuhus-
KULTUVRA Áiggošedje vurket priváhta dološ luđiid 

Áiggošedje vurket priváhta dološ luđiid 

-

-

Olusiin dáidet priváhta luohtekaseahtat iežaset ruovttuin. Daid háliidivččii Juoigalasat searvi gádjut jávkamis.

– Juoigalasat searvi diehtá olbmuin leat ruovttuin boares jietnabáttit, kaseahtat ja mini-discat maidda leat juoigan. Mii ballat ahte dain jávká jietna jus daid ii digitalisere. Danin bivdit olbmuid geain leat luođit maid ovdalaš olbmot leat juoigan báttiide, buktit dahje dahkat dihtosii midjiide, dadjá searvvi jođiheaddji Nils Johan Gaup preassadieđáhusas.

Juige vaikko lei gildojuvvon

Vaikko luohti ovdalašáigge adnui suddun ja fastin, de olbmot liikká juige. Olu luođit leat báddejuvvon.

Juiogalasat searvi lea aiddo ládje váldán vuostá 50 kaseahta mas ledje luođit mat leat digitaliserejuvvon, mat dál leat vurkejuvvon Sámi arkiivii.

GEÁHČADIT BÁTTIID: Juoigalasat searvi ja Sámi Arkiiva geahčadit dás luohtekaseahtaid maid Aslak Siri lea addán. Govven: Nils Johan Eira/Arkivverket
GEÁHČADIT BÁTTIID: Juoigalasat searvi ja Sámi Arkiiva geahčadit dás luohtekaseahtaid maid Aslak Siri lea addán. Govven: Nils Johan Eira/Arkivverket

Movttet

Márgge-Áilu, Aslak Siri Mieronis, lea addán iežas luohtevuorkká Juoigalasat searvái vai dat digitaliserejuvvojit.

– Dat leat báddejuvvon 60- ja 70-logus ja oallugat geat dain juiget eai leat šat min gaskkas, muitala Áilu.

Son lea movttet go ii dárbbaš šat jurddašit movt daiguin kaseahtaiguin galgá.

– Dat kaseahtat main mu eamit juoiggai ja čohkkii, dat gal leat billahuvvan. Dain ii šat gullon mihkke, dadjá son.

Jietna nohká

Juste danin go analoga, dološ báttit galggaše seailluhuvvot oalle galbmasis, ja go dain nohká jietna, de lea hoahppu Juoigalasat searvvis ja Sámi arkiivvas daid digitaliseret. 

Lea DigForsk Guovdageainnus mii daid báttiid lea digitaliseren.

– Báttiin ja kaseahtain oažžu leat oalle heajos jietna. Daid sáhttá divodit maŋŋel, muitala Per Mathis Siri, gii jođiha Guovdageainnu DigForsk.

Bivdá olbmuid váldit oktavuođa

Dál bivdá Juoigalasat searvi olbmuid singuin váldit oktavuođa vai ožžot čielgasa man olu gávdnojit priváhta vuorkkáin.

– Olbmot eai dárbbaš addit daid, muhto go mii ohcat digitaliserenruđa, de fertet diehtit sullii man olu luohtemateriála gávdno, dadjá Nils Johan Gaup.

- Advertisement -
-Almmuhus-