Áiggošedje searvat, muhto váilu ruhta, hárjeheaddji ja joavku

– Lea hui illudahtti go beasaimet mielde. Moai Håkan Kuorakain šattaime olu feaskárastit vai min jienastit. Jáhkán min jienastedje go mii leat ovdal searvan, ja jáhkán ahte lea dehálaš ahte searvat dán jagi, muđuid gal boahtte háve eai soaitte min šat jienastit, lohká FA Sámi várrepresideanta Elin Nicolaisen.

Soai FA Sámi presideanttain leigga ge dán vahkkoloahpa Bergamos Italias gos mearriduvvui makkár joavkkut dán gease besset searvat Conifa World Football Cup čiekčamiidda. 21 joavkkus galge válljet 12 joavkku ja dušše 4 saji ledje várrejuvvon Eurohpá-guvlui, masa FA Sápmi gullá.

Dárbbašit hárjeheaddji vai joavkku sáhttet hábmet

ConIFA World Footbal Cup čiekčamat álget miessemánu 28. beaivvi Sukhumas Georgias, ja loahpahuvvojit geassemánu 5. beaivvi. Ovdal go sámi riikkajoavku beassá dohko dollet, de váilo vuos ain olu.

– Mii fertet vuos nammadit riikkajoavkohárjeheaddji. Mis leat moadde evttohasa, geaid eat almmut gal dál. Jáhkkimis lea hárjeheaddji nammaduvvon vahkku, dahje guovtti vahko siste. Dan maŋŋil de beassat álgit hábmet riikkajoavkku ovttasráđiid hárjeheddjiin, čilge várrepresideanta.

Hástalus fitnet buoremus čikčiid

ConIFA spábbačiekčanlihttu lágida ge dán nuppes stuorra čiekčamiid. Dáidda čiekčamiidda servet maiddái joavkkut olggobealde Eurohpá. Vuosttaš Conifa World Football Cup lágiduvvui Staares, Ruoŧas 2014:s.

Dáin čiekčamiin ii lean gal sámi riikkajoavku láhka vuoitte ge, go sii gárte logádin. Dalle ii lean FA Sápmi nákcen hahkat sámi buoremus čikčiid, sin geat čikčet alla divišuvnnain, riikkajovkui.

Dán jagi sáhttet gártat seamma dillái go World Cupa lágiduvvo gasko ráidočiekčanáigodaga.

– Diet lea ge juste min stuorámus hástalus. Mii diehttelasat sávvat oažžut buoremus čikčiid mielde jovkui. Mii háliidat birget buorebut go mannan háve. Sávvamis joavkkut vuhtiiváldet ahte mii leat riikkajoavku ja oskkildit midjiide luoikat čikčiid, lohká Nicolaisen ja muitala iežaset gulahallagoahtit joavkkuiguin dalán go hárjeheaddji lea nammaduvvon.

Nicolaisen muitala iežaset leamaš jo muhtin alladási beakkán čikčiiguin ságaiguin, son ii almmut geaid birra dás lea sáhka, dušše muitala ahte čikčet eliteráiddus.

– Sávvat ahte sii besset searvat min jovkui, lohká Nicolaisen.

Ruhtadeapmi maid váilo

Diibmá ConIFA ii lágidan máilmmiviidosaš čiekčamiid, muhto baicce eurohpálaš čiekčamiid Ungáras. Dáidda čiekčamiidda ii searvan FA Sápmi go eai nákcen čohkket ruđa ovdal go dieđihanáigemearri dievai. Ii dán jagi ge leat ruhtahoidu vuos ortnegis.

Mannan vahkos muitalii FA Sámi várrepresideanta Elin Nicolaisen Ávvirii ahte mávssii 200 duhát ruvnno searvat World Cupi mii lágiduvvui Staares, dán jagáš Cupii navdet šaddat 50 duhát ruvnno divraseabbon searvat. Nicolaisen muitala alddiineaset váilot ain birrasii 100 duhát ruvnnu.

– Ruoŧabeale Sámediggi han hilggui min ohcamuša ja dáhtto ohcat go mis leat dihtoprošeavttat, dál mis lea dihtoprošeakta nu ahte Håkan lea dál jo vissa čállimin ođđa ohcamuša ruoŧabeale Sámediggái, sávvamis dál dorjot min, čilge Nicolaisen.

FA Sámi várrepresideanta maid muitala muhtin stuorra fitnodagaid ruoŧabealde leat čájehan beroštumi ruhtadit dahje sponset sin joavkku:

– Dát čiekčamat han ožžot stuorra mediafuomášumi, danne dat fitnodagat leat čájehan beroštumi. Nu ahte mii sávvat ruđalaš beliid ordnašuvvat vaikke juste dál váilo veahá ovdal go sáhttit vuolgit Georgiai.

Ja jus čoggo ruhta ja joavku, de FA Sápmi dolle Abkhasiai 19 čikčiin ja guđain veahkkeolbmuin.

Dát joavkkut čikčet 2016 ConIFA World Cupas:

Abkhasia

Padania

Raetia

Chagos Island

Somaliland

Kurdistan

Panjab

United Koreans of Japan

Northern Cyprus

Romani People

Sápmi

Western Armenia

(Joavkonamat lea čállon nu mo bohte ovdan lávvardaga jienasteamis Bergamos)