Guovdageainnu suohkanis leat badjel 500 fitnodaga dahje organisašuvnna mat barget dan maid sáhttá gohčodit hutkás ealáhussuorggis. Dál lea ge suohkan ohcan beassat pilohtasuohkanin Sámedikki prošektii Hutkás Gielda.
Guovdageainnu suohkanis leat badjel 500 fitnodaga dahje organisašuvnna mat barget dan maid sáhttá gohčodit hutkás ealáhussuorggis. Dál lea ge suohkan ohcan beassat pilohtasuohkanin Sámedikki prošektii Hutkás Gielda.
Prošeakta masa Guovdageainnu suohkan áiggošii mielde lea Sámedikki ođđa áŋgiruššansuorgi.
Dán prošeavttas váldá Sámediggi fárrui ja ovttasbargá gielddain ja ealáhusaiguin árrat, vai bargu čanastuvvo gieldda jođihangoddái ja daidda oassálastiide geat leat fárus.
Jagi 2018 mielde galgá prošeakta čađahuvvot ovtta gielddas Sámis, mii šaddá ovddasmannikunddarin, ja geainna ja geas Sámediggi galgá háhkat vásáhusaid.
Badjel 500 fitnodaga
– Guovdageainnu suohkanis leat 223 fitnodaga ja organisašuvnna main lea organisašuvdnanummár ja maid sáhttá dadjat gullet kreatiiva ealáhussuorgái. Jus diesa vel lasiha sin geat leat registreren fitnodaga mat barget boazodoaluin, de gártet oktiibuot 501 fitnodaga ja organisašuvnna, čállá Guovdageainnu suohkan ohcamušas Sámediggái.
Suohkana bealis deattuhit maid ahte Guovdageainnus lea maiddái sámi stuorámus duodje- ja juoiganbiras, gievrramus sámi servodat, stuorámus sámegiel suohkan, nannoseamos geavatlaš luonddugeavahanmáhttu ja Sámi stuorámus boazodoalloservodat.
Stuora vejolašvuohta ovdánit
Suohkan maid deattuha ohcamušas Sámediggái ahte sii oidnet stuora vejolašvuođa ahte suohkana fitnodagat ovdánit. Sii namuhit ovdamearkan stuora mátkkoštanealáhusprošeavtta maid diibmá bidje johtui ja man ulbmilin lea háhkat gievrras ja máŋggabealat ealáhusa.
Suohkan geassá maid ákkastallamis ovdán ahte suohkanis leat olu hutkás ja allaoahppan olbmot ja oktan suohkana olu fitnodagaiguin ja organisašuvnnaiguin addá dat buori vuođu bargat dákkár prošeavttain ja háhkat árvoloktema ja ovdáneami, ii dušše báikkálaččat, muhto maiddái olles guovllus.
Dohkkehan ja lohpidan doarjaga
Guovdageainnu suohkana ovdagoddi dohkkehii mannan vahkku ahte Guovdageainnu suohkan ohcá šaddat pilohtasuohkaniin Sámedikki prošektii Hutkás gielda.
Guovdageainnu suohkana ovdagoddi lea lohpidan bidjat 50 000 ruvnno ovddas hálddahuslaš návccaid dán prošektii, jus besset mielde.
Lea Sámediggi gii loahpalaččat mearrida guđe suohkana válljejit Hutkás Gielda prošektii pilohtagieldan.
