-Almmuhus-
-Almmuhus-
-Almmuhus-
OĐĐASATÁiggoše gieldit rakeahtaid

Áiggoše gieldit rakeahtaid

-

-

Eambbohat ja eambbohat roasmmehuvvet rakeahtaid geažil ođđabeairuohta. Dál evttohuvvo gieldit oalát priváhta olbmuid báhčimis rakeahtaid. 

Lea Tryg dáhkádus fitnodat mii evttoha dál gieldit oalát rakeahttabáhčima Norggas dan geažil go gártá beare divrrasin ja maiddái várálažžan.

Sii evttohit baicca ahte galgá buot báikkiin šaddat almmolaš rakeahttabáhčin, suohkana lágidemiin.

 

Olmmošvahágat lassánit

Maŋemus jagiid leat sullii 50 ja 70 lihkohisvuođa leamaš ođđabeairuohta main lea gártan olmmošvahát, čájehit servodatsihkarvuohta- ja gearggusvuođadirektoráhta logut.

Mannan ođđabeairuohta logut eai leat vuos čohkkejuvvon, muhto gaskaboddosaš logut čájehit ahte duođalaš čalbmevahágat leat duppalaston diimmá ektui.

 – Mii diehttelasat galgat ávvudit ođđajagi, muhto go nu oallugat roasmmehuvvet, de lea áigi gieldit oalát rakeahtaid, lohká Opedal. 

 

Dagahit buollimiid miljovnnaid ovddas

Lassin olmmošvahágiidda, de leat buollimat maid hirbmat ollu rakeahttageavaheami geažil.

Ođđabeairuohta ja ođđajagemánu 1. beaivvi leat maŋemus jagiid registrerejuvvon 1500 buollima. Dat mielddisbuktá jahkásaččat dáhkádusmávssuid sullii 50-60 miljovnna ruvnno ovddas,Tryg loguid mielde. 

– Servodat máksá badjel 60 miljovnna ruvnno ođđabeairuohta ávvudeami geažil, lohká Tryg dáhkádusfitnodaga hoavda Espen Opedal.

– Rakeahtat leat bávkkanasat, ja vel unna rakeahtažat ge sáhttet dagahit agibeaivái olmmošvahágiid dahje juo buollimiid.

Son lohká maid ahte vaikko soabberakeahtaid gilde 10 jagi áigi, de lea dál áigi gieldit buot rakeahtaid.

 

Oallugat háliidit gildosa

Tryg-hoavdda evttohus gieldit rakeahtaid oažžu doarjaga iskkadeamis maid NITO lea čađahan.

70 proseantta jerrojuvvon olbmuin áiggoše gieldit priváhtaolbmuid báhčimis rakeahtaid, jus ovdamearkka dihte suohkanat lágidivčče almmolaš rakeahttabáhčima. 

– Mii gal oaivvildit ahte die lea buoremus vuohki. Diktit suohkaniid lágidit rakeahttabáhčima, de besset mánát ja rávesolbmot ávvudit násterišoniin baicca ja dainna lágiin ožžot sihkkaris ávvudeami. Dainna mii hehttešeimmet ahte olbmot roasmmehuvvet,  eai ge soaittaše šaddat viessobuollimat ođđabeairuohta, lohká Opedal. 

-Almmuhus-