-Almmuhus-
OĐĐASATÁiggoše cegget Norgga vuosttaš sámi govvadáiddamusea

Áiggoše cegget Norgga vuosttaš sámi govvadáiddamusea

-

-

Mátta-Várjjaga sátnejođiheaddji Rune Rafaelsen, Sámediggeráđđelahttu Mariann Wollmann Magga ja museajođiheaddji Liv Astrid K.Svaleng deaivvadit Statsbyggain geahčadit makkár vejolašvuođat leat cegget sierra Saviomusea Mátta-Várjjagii. Sámediggeráđđi lea mielas addit ruhtadoarjaga jus šaddá vejolašvuohta cegget Norgga vuosttaš sámi govvadáiddamusea.  – Ii leat juohkebeaivválaš ášši ahte suohkanat bidjet johtui proseassaid oččodit johtui ođđa sámi institušuvnna, lohká Magga preassadieđáhusas.

Sátnejođiheaddji Rune Rafaelsen, Bargiidbellodat, ja Sámediggeráđđelahttu ealáhusaide ja kultuvrii, Mariann Wollmann Magga, Bargiidbellodat, háliideaba loktet oidnosii dovddus dáiddára John Andreas Savio dáidaga. Mánnodaga deaivvadeaba Mátta-Várjjaga politihkkara guovttos Statsbyggain, ulbmil lea iskat vejolašvuođaid huksegoahtit sierra Saviomusea.

 

Jurdda ii leat dál ilbman

Saviomuseas lea dál birrasiid 100 m2 čájáhusareála Grenselandmuseas. Sierra Saviomusea huksema jurdagat eai leat dál ilbman, baicce lea guhká juo jurdda leamaš jođus sihke ovdalaš museajođiheaddjis Sigrunn Rasmussenis ja dálá jođiheaddjis, Liv Astrid Kvammen Svaleng, gii maid oassálastá čoahkkimis mánnodaga ovttas politihkkariiguin.  – Mii leat mášoheamit oažžut daid plánaid sadjái nu ahte oččošeimmet Savio dáidaga vistái mii lea olámuttus olbmuide, mii sáhttá mielddisbuktit ahte olahit dan ođđa dáiddačoakkalmasa eambbogiidda. Visti galggašii maid heivet Savio dáidaga ja historjjá gaskkusteapmái. Musea galggašii šaddat guovddážin sámi kultuvrii, sámegillii ja historjái Mátta-Várjjagis, dadjá Rune Rafaelsen preassadieđáhusas.

 

Vuosttaš lávkkiid váldán

Dál leat vuosttaš lávkkit váldon sierra Saviomusea huksema guvlui. Olu oasit galget oktii čohkkejuvvot ja dát lea vuosttažettiin Saviomusea, Deanu, Várjjat Museasiidda ovttasbargu. Báikkálaš olbmot ja earát galget maid beassat buktit oaiviliid áššái.

 

Positiiva doarjut

Sámediggeráđđi oasálastá proseassas álggu rájes. Sámediggeráđđi lea positiiva addit ruhtadoarjaga huksemii, ja dat šaddá ge dárbbašlaš ovddasguvlui.

– Ii leat juohkebeaivválaš ášši ahte suohkanat bidjet johtui proseassaid oččodit johtui ođđa sámi institušuvnnaid, lohká Magga.

 

– Danne háliida Sámediggeráđđi doarjut dán vuolggaheami Mátta-Várjjat gielddas ja geahčadit vejolašvuođaid cegget Norgga vuosttaš sámi govvadáiddamusea, loahpaha Magga preassadieđáhusas.

-Almmuhus-