Distaga ja gaskavahkku lágiduvvojit guokte maŋemuš rabas čoahkkima ja danne lea ge maid áigemearri sáddet cealkámušaid Sámediggái duorastaga cuoŋománu 26. beaivvi.
Sámediggi lea ožžon bargun buktit cealkámuša Stuorradiggái duohtavuođakommišuvnna mandáhta birra. Danne leat ge lágidan rabas čoahkkimiid máŋgga sajis Sámis.
Distaga ja gaskavahkku lágiduvvojit guokte maŋemuš rabas čoahkkima ja danne lea ge maid áigemearri sáddet cealkámušaid midjiide duorastaga cuoŋománu 26. beaivvi, čállá Sámediggi.
– Jus lea oktage gii ii leat vel ollen addit dahje sáddet midjiide cealkámuša, de ferte dan dahkat dál. Mii leat loahpageahčen čoahkkinplánas ja dat mearkkaša ahte mii hábmegoahtit hui fargga Sámedikki cealkámuša mii galgá meannuduvvot dievasčoahkkimis, muitala sámediggeráđđi Henrik Olsen preassadieđáhusas.
Atnet árvvus go olbmot beroštit
Sámediggi lea lágidan 16 rabas čoahkkima dássažii ja oallugat leat leamaš čoahkkimiin.
– Mii atnit árvvus go Sámi álbmot duođaid orru berošteame dán proseassas ja leat dehálaš cealkámušat maid sii leat buktán midjiide. Mii áigut vuđolaččat ráhkkanahttit ášši sihke Sámedikki dievasčoahkkimii ja Stuoradikki meannudeapmái, lohká Olsen.
Guokte maŋemus rabas čoahkkima lágiduvvojit Aajege saemien gïele- & maahtoejarnge, Plassjes, distaga cuoŋománu 24. beaivvi ja Tråantes, Best Western Hotell Bakeriet čoahkkinlanjas, gaskavahkku cuoŋománu 25. beaivvi.
