Kalle Urheim galgá geasset čuojahit Márkomeannu festiválas.
Kalle Urheim galgá geasset čuojahit Márkomeannu festiválas.
Kalle Urheim lea olahan olu fuomášumi iežas vuosttašalmmuheami rájes. Geasset galgá son čuojahit Márkomeanus. Dan dieđiha Márkomeannu preassadieđáhusas.
– Min mielas lea Urheim hui gelddolaš artista. Su gaskkustanvuohki lea áidnalunddot, ja vuohki mo son nagoda seaguhit rocka, jazza, sámi sálbmaárbevieruid ja luođi, dagaha su artistan man gánnáha vásihit, dadjá festiválabuvttadeaddji Susanne Amalie Langstrand-Andersen.
Divttasvuona artista lea ožžon rámi sihke dáža ja sámi mediain, ja guldaleddjiin maid, maŋŋágo su vuosttaš skearru «Ruodjo /Sacred breath from the Tundra» almmuhuvvui. Márkomennui son boahtá roastilat go goas ge ovdal, ja áibbas varas lávlagiiguin.
Vuoitán Sámi Grand Prix
Kalle Urheim, Divttasvuonas eret, lea kulturoperatevra, poehta, komponista, lávllačálli ja lávlu, ja son lea studeren Musikkonservatorietas Romssas.
Son komponere musihka man vuođus lea julevsámi juoigan- ja lávlunárbevierru, julevsámegillii, dárogillii ja eaŋgalasgillii.
Son lei mielde Sámi Grand Prix:s 2015:s ja šattai álbmoga jiellahin šuoŋain «Idjasuojvvan». 2016:s almmuhii son vuosttaš skearru, «Ruodjo». Avisa Nordland attii sutnje 6:ža ovdanbuktima ovddas.
– Urheim ieš lohpida cegget iežas musihkalaš loavddagoađi, cahkkehit dola vai olbmot besset liekkadit iežaset ja guossohit vuonaid ja váriid jiena. Lea láhččojuvvon magihkalaš vásáhussii, loahpaha Langstrand-Andersen.
Márkomeannu lea sámi musihkka- ja kulturfestivála mii lágiduvvo Evenášši ja Skániid suohkanrájis suoidnemánus juohke jagi. Festivála presentere juohke jagi sámi artisttaid, dáiddáriid ja kulturolbmuid olles sámi guovllus. Prográmmas lea musihkka, visuála dáidda, lávdedáidda, girjjálašvuohta, seminárat, valáštallan, vádjolusat, sámi márkan, ja vel sierra mánáid- ja nuoraidprográmma. Márkomeannu lágiduvvo dán jagi suoidnemánu 27.-29. b.
