Fálesnuori gielda lea mielas ahte ruvkedoaibma galgá álggahuvvot sin gildii, ja ikte čilgii sátnejođiheaddji Sámediggái manin leat positiivvat ruvkii.
Fálesnuori gielda lea mielas ahte ruvkedoaibma galgá álggahuvvot sin gildii, ja ikte čilgii sátnejođiheaddji Sámediggái manin leat positiivvat ruvkii.
Duorastaga galgá Sámedikki dievasčoahkkin meannudit Nussira ja Gumppenjuni ruvkedoaimma ja dan oktavuođas lei bovden rabas gulahallamii vuossárgga, gosa Luonddu ja nuorat searvi, Fiettar orohat, Luonddugáhttenlihttu, Sámedikki nuoraidlávdegoddi ja Fálesnuori gielda ledje dieđihan beroštumi oassálastit. Buohkat ožžo logi minuhta sátnevuoru ovddidit iežaset oainnu.
Fálesnuori sátnejođiheaddji Terje Wikstrøm lei áidna guhte ovddidii ja lei mielas ásahit ruvkedoaimma Nussirii ja Gumppenjunnái, muđuid ákkastedje buohkat vuostá.
– Seailluhit sámevuođa, de ferte leat doaibma ja ovdáneapmi gielddas. Fálesnuoris lea olmmošlohku niedjan jagis jahkái, ja nu geahnohuvvá gielda beroškeahttá lea go boazosápmelaš, mearrasápmelaš dahje dáža, lohká Wikstrøm.
Sámi kultuvra ja identitehta
Terje Wikstrøm deattuha ovdáneapmi gildii lea maid vuoruhit, ja lea ággan manin sii leat mielas ásahit ruvkedoaimma gildii.
– Mii nannet sámevuođa. Mis ferte leat fokus, sámi kultuvra ja identitehta ii boađe iešalddis muhto boahtá das mo mii olbmot láhčit dili ja maid vuoruhat. Mearrasámit eai dušše bargga guolástemiin, sii barget maiddái ruvkkes ja gávppiin. Mearrasámi gilit goarránit jus galgá juohke ovdáneami cakkadit, čilge son.
Eai ovddidan ávžžuhusa
Fálesnuori gielddas ii lean makkárge ávžžuhus Sámediggái, muhto sin dáhttu lea čuvget dieđuid manin gielda lea positiiva ruvkedoibmii.
– Mii leat mielas ásahit ruvkedoaimma gildii ja ahte ruvkebázahusaid luoitit Riehpovutnii, loahpaha Fálesnuori sátnejođiheaddji.
Vuordámušat
Sámedikki ealáhus- ja kulturlávdegotti jođiheaddji Mariann Wollmann Magga, guhte lágidii rabas gulaskuddama, lohká ledje miellagiddevaš ja gelddolaš dieđut mat bohte ovdan.
– Beasaimet gullat beliid ja oainnuid maid eat leat gullan. Ledje ollu buorit cealkámušat ja ákkasteamit. Lei nu go ledjen vuordán, ahte Fálesnuori gielda lea mielas ja earát vuosttaldit ruvkedoaimma, muhto buohkat ákkastedje bures. Lean hui duđavaš gulaskuddamiin, lohká Mariann Wollmann Magga.
Stuorra vahát orohahkii
Fiettar orohaga ovdaolbmo Mikkel Nils M. Sara mielas lei buorre beassat ovddidit boazosápmelaččaid oainnu áššis. Fiettar orohat lea okta dain orohagain mii vásiha ollu sisabahkkemiid, ja orohaga ovdaolmmoš ii loga eahpádussan ge ahte ruvkedoaibma šaddá stuorra vahágin.
– Ruvkedoaibma lea okta dain vahágiin mii sáhttá gomihit oalle ollu boazodoalus. Dás eai leat dahkkon makkárge váikkuhusguorahallamat obbalohkái. Ii oktage dieđe makkár váikkuhusat ruvkedoaimmas leat, muhto diehtit ahte lea vahát. Sáhttá leat stuorát vahát go jurddašit, lohká Sara, guhte lea áibbas vuostá ahte ruvkkiid galget ásahit guohtoneatnamiidda ja gáržžidit eatnamiid boazodoalus.
Birasgáhttendirektoráhtta attii lobi diimmá juovlamánus ásahit ruvkedoaimma Fálesnuorrái.
